SIMUNJAN: Peranak Kampung Melanjok Asal deka lantang ngasaika infrastruktur meruan agi lebuh agih belanja RM150,000 dikemendar ungkup projek ngaga parit semin ba genturung pendiau nya.

Kaban Kunsil Nengeri (ADUN) Simunjan, Awla Dris madah, projek nya udah bulih pemendar lalu deka digaga pengudah diperesa silik raban Opis Parit enggau Entali Ai (DID) begulai enggau Tuai Rumah nentuka projek lanchar nitih langgur.

Ku iya, projek nya sebedau tu laun digaga ketegal penanggul pemendar ngerenchah jalai tauka ‘wayleave’ ngaul sekeda peranak genturung pendiau.

Taja pia, ku iya, penanggul nya diatu mujur diputar pengudah semua raban setuju ke projek nya dipejalai.

“Aku ngarap ke ari agih belanja tu, projek badu agi napi sebarang penanggul ngambi pemansang udah dipejalai lanchar ungkup pengelantang rayat,” ku iya.

iya nyebut pekara nya nengah teks jaku dibacha Pegawai Khas iya, Rafendy Ariffen serimbai Pengerami Ngiling Bidai Kampung Melanjok Asal, kena Hari Enam.

Awla mega meri terima kasih ngagai peranak Kampung Melanjok Asal udah meri kerejasama ngemujurka pemansang ba menua nya sereta negapka penyerakup komuniti.

Ngenang pasal pengerami ngintu Gawai Dayak, iya madah ke hari besai nya lambang meri terima kasih ke jereki diterima kelimpah nyadi pelasar nyempil kaul enggau negap semangat kerejasama rayat.

Pengerami nya mega richah enggau adat asal raban bansa Iban, Ngetas Ranyai, ke nyadi lambang besai ngintu Gawai Dayak sereta ngayan semangat segulai sejalai sereta nyagu pesaka budaya peranak menua. -EDISI UKAS