Menteri Pemansang Indu, Ruang Bilik enggau Komuniti, Dato Sri Nancy Shukri madah, mayuh inisiatif pemansang udah enggau deka dipejalai ba genturung pendiau nya nentuka perengkaguna peranak majak ditambah kelimpah ngeranchak sektor dagang temuai lokal.
Ku iya, ba taun 2025, projek ngaga baru Jalai Penyambung Genturung Pendiau (JPD) Kampung Trombol beungkus RM500,000 mujur digaga lalu nya udah nambahka akses enggau rentayan penyambung peranak.
“Aku mega deka madah ke projek ngaduka jalai tama ke Pantai Paradise Trombol ke ditengah peranak enggau temuai udah bulih pemendar agih belanja sepenyampau RM350,000 ari baruh Program Transformasyen Menua Pesisir (RTP) Kaban Parlimen taun 2027 lalu deka digaga enda lama da.
“Kelimpah ari nya, ngaga baru agu mensia mayuh enggau bilik mandi ba palan dagang temuai Pantai Paradise Trombol beungkus RM100,000 mega udah dikemendar lalu digaga enda lama da,” ku iya.
Iya bekunsi berita manah nya lebuh Program Bakih Palan Bantu Rama Menua (PSSS) Yayasan Pengintu Pengelantang Menua (YKN) Nembiak Siru enggau Jelajah Hijau di Pantai Paradise Trombol, ditu, Hari Minggu.
Kaban Parlimen Santubong nya madah baru, pengawa nyendiaka perengkaguna pemun ke lantang enggau genap agi beguna endar dikena nyukung sektor dagang temuai lokal tumbuh sereta meri penguntung ngagai peranak dia.
Ku iya, pengawa meranak puku ke pemansang ti dikemendar nya ngayanka perintah seruran ransing ngangkatka Kampung Trombol nyadi menua ukai semina narit ati ari sukut dagang temuai aja, tang ngembuan perengkaguna enggau infrastruktur ke ulih nambah tikas idup peranak.
