MIRI: Peranak di Miri lebih agi penguna ti deka napi bekal ai tejanggal betaga berindik ari pengawa ngaduka paip besai Miri-Bintulu dipinta ngadang tumu sereta nitih gerah rasmi belama.

Menteri Pengangkut Sarawak ke mega Kaban Kunsil Nengeri (ADUN) Senadin, Dato Sri Lee Kim Shin madah, pengawa ngadu nya udah dlanggur silik raban bekuasa bekaul enggau kerejasama mayuh agensi nentuka empas penanggul ngagai pengawa ulih dijaga.

Ku iya, sistem bekal ai besai di Miri bepanggai ba dua batang paip besai bediameter 1,100 milimeter enggau 750 milimeter ke nyadi tiang sukung ngagai bekal ai ba mengeri.

Ku iya, paip pantis udah ditemu ba siti ari paip nya lalu pengawa meresa silik benung dipejalai dikena ngelala endur pantis kebendar sebedau pengawa diadu.

“Penguna mega diberi timpuh ke chukup besikap nyengkaum nyimpan ai enggau nentuka tangka simpan sida diisi penuh sebedau pengawa berengkah.

“Semua gerah udah diberi ngagai penguna nengah jaku tesau, infografik enggau mayuh chara bukai. Aku ngarap ke rayat ulih meri kerejasama enggau besikap nitih perambu ke udah ditetapka,” ku iya.

Iya nyebut pekara nya lebuh dirandau media pengudah ngulu Program Randau Ruai diatur Komiti Pemansang enggau Pengelikun Genturung Pendiau (JKKK) Kampung Pengkalan Lutong enggau Kelab Indu Lutong enggau kerejasama Polis Diraja Malaysia (PDRM) Bagi Menua Miri di Balai Mayuhguna Kampung Baru Lutong, kena Hari Enam.

Iya madah baru, pengawa ngaduka paip pantis ditaga berengkah 10 Jun lalu disadang tembu 11 Jun enggau timpuh kereja pengelama 24 jam.

Ku iya, raban bekuasa mega nyendiaka lori tangki ai sereta perengkaguna bukai ngambi mensia mayuh ulih ngambi bekal ai enti sema bisi beguna sekumbang timpuh nya.

Berebak enggau nya, Dato Sri Lee madah, pengawa matau deka seruran dipejalai sekumbang pengawa ngadu paip nya nentuka penerang pemadu baru ulih diberi ngagai mensia mayuh nengah media sosial, radio enggau chara rasmi bukai.

“Enti pengawa patut ditampung, penerang deka dipadah jampat ngagai mensia mayuh. Nya kebuah, aku ngelalau peranak seruran mendingka jaku gerah pemadu baru pasal status bekal ai sekumbang pengawa tu diatur,” ku iya.-EDISI UKAS