KUCHING: Pemujur Kuching City FC (KCFC) masuk ke pekit kelab renggat Asia dipeda pemujur besai ti ngayanka atur pengawa nemban tim sereta pemansang positif main bol Sarawak.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, pemujur nya chukup ngemegah laban tim nya semina besikap urung sepuluh taun endur nyadi entara kelab pemadu nyulut menua lalu rembus panggau Asia.

Ku iya, pemujur siti-siti tim ukai semina bepanggai ba belanja aja, tang begunaka atur pengawa ke sikar enggau bisi tunga kuing ke nyengala.

“Kitai berasai lantang ati meda penyulut Kuching City FC. Nadai entu lama endur sida mujur tama renggat kepenudi Piala FA lalu ulih bepekit ba kelab Asia.

“Tu siti pemujur chukup besai lalu ngayanka atur pengawa ti chukup manah,” ku iya ba aum media di Kuching, kena Hari Lima.

Nya alai, Dato Sri Abdul Karim madah ke opis menteri enggau Kaunsil Lumba Sarawak (SSC) deka majak meri perati ngagai pemansang main bol renggat baruh ari ngatur pekit kediri ba renggat nengeri nitih kategori umur ba selampur Sarawak.

Tuju inisiatif nya, ku iya, nyendiaka ekosistem main bol ti meruan dikena nempa mayuh agi pemain bepenau sereta ngerandang peluang ngagai kelab ari mayuh bagi menua di nengeri tu.

Iya mega madah, rayat Sarawak meda KCFC ukai semina ngari ke mengeri besai Kuching aja, tang sebagi ari tim ke mai nama enggau juluk semua Sarawak ba panggau nasional enggau antarabansa.-EDISI UKAS