LIMBANG: Perintah Sarawak majak meri perati ngagai pemansang menua pesisir ngena chara pemansang nyerangkung semua ti mungkur genturung pendiau, rumah panjai, pasar enggau mengeri dikena nentuka buah pemansang ulih diasai semua rayat.
Sapit Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri (ADUN) Bukit Kota, Datuk Dr Abdul Rahman Ismail madah, chara nya senutuk enggau pengeran perintah nengeri ngedut takah pemansang entara menua pesisir enggau mengeri.
“Premier kitai deka ngaduka pemansang ari genturung pendiau nyentuk pemansang ba pasar enggau pemansang di mengeri besai nyengkaum kitai di Limbang,” ku iya.
Iya nyebut pekara nya ba mua mayuh rambau Program Ngiling Bidai 2026 di Rh. Imau kena Hari Empat.
Ku iya, pemansang ke dipejalai chara inklusif beguna endar dikena ngangkatka tikas idup rayat sereta nentuka nadai menua tinggal ari arus pemansang nengeri.
Ba program ke sama, iya ngemendarka sekeda peminta komuniti ba Rh. Imau nyengkaum lima unit tangki ai berega RM2,500 enggau PA System penyampau RM2,500.
Kelimpah ari nya, sepenyampau 30 unit kereban pengerara api mega dikemendar ngena agih belanja RM6,600 dikena nambahka tikas pengelikun peranak rumah panjai nya.
Iya mega madah ke pengawa ngaduka atao rumah siku peranak, Romika Tanggi deka digaga ngena agih belanja Program Nyeruri Rumah Rayat Seranta Sarawak ari baruh Projek Pemansang Mit Menua Pesisir (MRP) taun baru ngena ungkus RM12,000.
Sama datai, Chairman Kaunsil Pelilih Limbang ke mega Tuai Raban Nembiak PBB Bukit Kota Sufian Mohat, Tuai Rumah Imau Mandoh, Sapit Tuai Raban Indu PBB Bukit Kota Noratijah Bakar, Tuai Raban Nembiak Protem PBB Bukit Kota Mohd Adzri Adrus sereta Chairman Pengatur Program Ngiling Bidai 2026 James Habol Koyor.-EDISI UKAS
