MIRI: Pengawa ngaduka paip besai bekal ai di Batu 7, Jalai Miri–Bintulu deka dipejalai kena 10 Jun tu berengkah pukul 5 lemai, lalu bekal ai dipelaba tejanggal nyentuk 24 jam.

Menteri Utiliti enggau Telekomunikasyen Sarawak, Dato Sri Julaihi Narawi, madah ke pengawa nya udah dilanggur asil ari pengawa matau teknikal pengudah ditemu bisi pantis ba batang paip besai dia.

Ku iya, bekal ai tejanggal, ai lubah niki enggau laun bisi ai baru ngaul sekeda endur di Miri ngaul rentayan batang paip besai 750 mm MSCL enggau 1100 mm DICL.

“Endur batang paip ke pantis deka ulih ditemu kena 10 Jun pengudah pansik enggau serenih teknikal tembu dipejalai.

“Udah nya, raban teknikal deka ngenuku sekali ke bisi pantis ba batang paip 750mm tauka 1100mm,” terang iya.

Iya nerang pekara nya ba aum media pengudah ngabas batang paip besai di Batu 7, Jalai Miri-Bintulu kena Hari Lima.

Entara endur disadang napi bekal ai tejanggal maya ngaduka paip 750mm MSCL iya nya Taman Jelita, Taman Tunku, Jalai Ekabang, Sungai Daing, genturung Eastwood, Hiltop, Riam enggau Taman Delight.

Seraya pengawa ngaduka paip 1100mm DICL iya nya Krokop/Jeefoh, Jalai Bulan Sabit, Piasau, Pulau Melayu/Bayshore, Pujut, Vista Perdana, Desa Bahagia, Permyjaya/Desa Pujut, Desa Indah; Southlake, Tudan, Senadin, Lutong, Kuala Baram, Kampung Masjid, Sungai Tujoh enggau Kampung Beraya.

Iya madah baru, pemutus ngaduka pengawa nya digaga ngelebus ngintu Hari Raya Aidiladha enggau Gawai Dayak dikena nyeliah bekal ai tejanggal maya besikap ngintu hari besai, kelimpah nentika sistem bekal ai di Miri enggau menua ngelingi nya tegap.

“Kitai udah matau belama pekara tu laban bisi kelai paip pantis ba endur nya. Nya kebuah, pengawa ngadu meseti dipejalai betaga enggau dijaga.

“Pengawa ngaduka dipelaba begunaka 12 jam endur tembu, dientudi 12 jam tambah endur ai nya pulai baka selama enggau negap peneras ai ba endur nya,” ku iya.

Iya mega madah, gaya tanah enda tegap ba rentayan projek Jalai Besai Pan Borneo dikelala entara pun penanggul paip besai dia pantis.

Ku iya, struktur tanah mami enggau tanah rarat dia meri empas ngagai penegap infrastruktur paip ke bisi.

Berebak enggau nya, iya minta mensia mayuh enda begau ketegal bekal ai tejanggal laban nya semina pengawa ti diatur betaga.

“Tang, timpuh endur ai bisi baru baka selama ba menua pesisir endang lama nyengkaum
Beraya, Sibuti enggau Bekenu bepanggai ba sistem.

Perintah nengeri nyendiaka abis nadai 18 lori tangki ai, enggau penyampau dipelaba ditambah ngagai 27 nyentuk 28 lori nitih peminta ba menua,” ku iya.

Kelimpah ari nya, sekeda palan ngambi ai sementara mega disedia ba endur strategik nyengkaum Loji Meresi Ai Lambir sereta endur ditapat di Miri ungkup ngemuntangka penguna.

Siti palan ngatur operasyen deka disedia ba Loji Meresi Ai Lambir dikena nyeraris sebana, bantu enggau matau operasyen 24 jam ngaul Sarawak Water begulai enggau agensi bekaul.

Mensia mayuh ba menua nya dilalau nyimpan ai ke chukup tumu agi sereta bekelimat ngena ai.

Dulu ari nya, iya ngetuaika aum penyeraris ungkup berandauka pengawa besikap,
koordinasi operasyen, komunikasyen mensia mayuh enggau atur bekaul pengawa ngadu paip besai di Batu 7, Jalai Miri-Bintulu.

Sama datai, Sapit Menteri Luar Nengeri Malaysia ke mega Kaban Parlimen Sibuti, Datuk Lukanisman Awang Sauni; Sapit Menteri Nembiak, Lumba enggau Pemansang Orang Dagang Sarawak. (Pemansang Orang Dagang) ke mega ADUN Lambir Datuk Dr. Ripin Lamat sereta nengah tali arus Menteri Pengangkut Sarawak, Dato Sri Lee Kim Shin; Menijar Kanan Operasyen Sarawak Water Sdn Bhd, Ir. Ts. Gs. Br. Zaid Iskandar Jaraiee sereta pengari ari mayuh agensi.- EDISI UKAS