SIMANGGANG: Sepenyampau RM31,000 agih belanja ari baruh Projek Pemansang Mit Menua Pesisir (MRP) udah diberi ngagai sekeda organisasyen komuniti ba sitak Kunsil Nengeri (DUN) Simanggang.
Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, ari penyampau nya, RM5,000 diberi ngagai Komiti Pemansang enggau Pengelikun Genturung Pendiau (JKKK) Rumah Rebi, Stumbin B sereta RM3,000 ngagai biro indu.
Iya nyebut pekara nya lebuh bejadika Pengerami Ngiling Tikai di Rumah Rebi, Kampung Stumbin B ditu, Hari Lima.
Ba pengerami ke sama, iya mega bisi nyua chek MRP penyampau RM23,000 ngagai empat JKKK ba sitak DUN Simanggang iya nya JKKK Rumah Inchang ari Skirau Ai, JKKK Rumah Rebi ari Stumbin B, JKKK Rumah Able ari Stumbin enggau JKKK Tawang Ili ari Tanjung Bijat.
Ku Kaban Kunsil Nengeri (ADUN) Simanggang nya, bantu nya sebagi ari pengawa seruran dipejalaika perintah dikena nentuka organisasyen komuniti bisi belanja ke chukup dikena ngatur mayuh aktiviti ngaul komuniti enggau pemansang komuniti.
Ngenang pasal pengerami, iya mega madah ke pemesai guna ngetanka pengawa ngabang tauka ngusung pangan diri serimbai ngintu Gawai Dayak nyadi pelasar ngenegapka penyerakup enggau pengelantang rayat pupu bansa di Sarawak.
Ku iya, Gawai Dayak ukai semina hari besai diintu ninting taun aja, tang nyadi pelasar besai narak semangat segulai sejalai sereta ngingatka pengelain budaya ke nyadi pengering Sarawak. -EDISI UKAS
