LUNDU: Pelajar agi nyadi ‘senyata’ pemadu ngasi dikena ngubah pengidup orang siku-siku, diri sebilik enggau komuniti, nya kebuah rebak biak kelebih agi ba menua pesisir patut ngena manah mayuh peluang disediaka Perintah Sarawak dikena ngulihka pengidup ke menyana agi.
Kaban Kunsil Nengeri (ADUN) Opar, Billy Sujang madah, Sarawak diatu ba jalai pemansang ti deras enggau mayuh peluang baru ba sektor ekonomi, teknologi enggau industri ngena pengelandik, lalu nya begunaka mayuh agi modal mensia bisi kualiti ngemudi pemansang nengeri dudi hari.
Berindik ari nya, iya ngansak bala nembiak ba menua Opar nampung pelajar ngagai tikas tinggi agi ngulihka peluang ke deka datai ba jeman pemansang baru Sarawak.
Iya nyebut jaku nya lebuh bejadi Pengawa Nyua Bantu Insentif Pelajar Sitak Kunsil Nengeri (DUN) Opar 2026 di CENTEXS Lundu, kena Hari Lima.
Ba pengawa nya, bisi 129 nembiak ari DUN Opar ke nampung pelajar ngagai tikas Diploma enggau Ijazah Sarjana Muda nerima bantu insentif dikena nyaup ngelempungka tating belanja sida sebilik.
Ku Billy, taja bantu diberi engka enda mayuh, tang nya ulih meri empas besai ngagai nembiak besikap dulu baka pengangkut, endur diau enggau kereban dikena belajar.
“Pelajar ukai semina ngerandang peluang gawa ke menyana agi, tang nempa runding, nambah penau ngaga pemutus enggau nempa orang ti ulih gawa ke pemansang komuniti sereta nengeri,” ku iya.
Iya mega ngelalau bala penerima enda ngetu naka Diploma tauka Ijazah Sarjana Muda aja, tang nambah tikas pelajar enggau pengelandik ngambi ulih besemekih ba dunya ti majak mayuh pemar.
Sama datai, Sekretari Politik Premier Sarawak Niponi Undek, Pegawai Pelilih Lundu Zulkarnain Ismail, Sekretari Kaunsil Pelilih Lundu Wan Fauzi Wan Ismail sereta Tuai Kampus CENTEXS Lundu Nor Ashikin Abdul Rahman. -EDISI UKAS
