DARO: Program Randau Komuniti ke diatur Unit Komunikasi Awam Sarawak (UKAS) Bagi Menua Mukah beguna endar nyadi pelasar meri penerang perintah ngagai rayat, lebih agi menua pesisir.

Kaban Kunsil Nengeri (ADUN) Daro, Dr. Safiee Ahmad madah, program baka nya nyadi inisiatif engkeman nentuka rayat nerima penerang ke betul, amat enggau pemadu baru bekaul polisi enggau agenda pemansang perintah.

“Chara ngundang rayat nengah program baka tu patut ditandu enggau ditambah laban tu ukai semina pelajar meri penerang aja, tang meri peluang berandau betunga mua entara perintah enggau rayat,” ku iya.

Iya nyebut pekara nya lebuh bejadika Program Randau Komuniti 2026 Renggat Bagi Menua Mukah sereta Pengerami Ngiling Bidai Rumah Panjai Nangar Kecil, Daro di Rumah Jaul Jinggong, Nangar Kecil, Daro kena Hari Enam.

Berindik ari nya, Dr. Safiee ngansak raban UKAS ngemayuhka agi pejalai Program Randau Komuniti enggau ngerembaika program nya ngagai renggat pelilih ngambi mayuh agi rayat bulih penerang terus ari perintah.

Iya mega madah, UKAS ngesan tanggung[engawa besai nentuka rayat mereti ke polisi perintah sereta bemacham inisiatif pemansang dipejalai ungkup pengelantang rayat enggau pemansang Sarawak.

Berebak enggau nya, Dr. Safiee udah nyua surat gerah Program Transformasyen Menua Pesisir (RTP) 2026 ungkup Projek Ngadu Gerija Borneo Evangelical Mission (SIB) Nangar Kecil beungkus RM250,000.

Iya mega nyua pemeri RM19,000 ngagai empat Komiti Pemansang enggau Pengelikun Pendiau (JKKK) Rumah Panjai Nangar Kecil, Daro kelai sukung ngagai pengawa nambah pemansang rayat sereta meransang ngatur aktiviti ngaul komuniti ba menua nya.

Dulu ari nya, mayuh isi program diatur nyengkaum sesyen meri penerang ari agensi perintah bekaul pangku pengawa opis, inisiatif perintah ke diatu sereta bantu enggau perengkaguna ke tau dikena rayat.

Program nya mega richah enggau pemandang ari mayuh agensi perintah enggau madah chara ngerara api enggau tuju nambah penemu komuniti pasal pekara pengelikun enggau pengawa ke patut digaga maya napi penusah.

Sama datai, Pegawai Pelilih Daro Zul Usup, Tuai Penulung Direktor UKAS Anwar Hanafi Ardimanshah, bala tuai enggau pengari opis, Tuai Raban Bansa enggau Tuai Komuniti (KMKK) sereta bala kaunselor Kaunsil Pelilih Matu enggau Daro (MDMD).-EDISI UKAS