KUCHING: Koperasi Pengajar Bumiputera Sarawak (KOBAGUS) merambu ngaga projek genturung rumah ba menua Bako ba tanah urung 10 ikar pemesai.
Chairman KOBAGUS, Mohamad Mortadza Mantrang madah, tuju penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg berandauka sekeda pekara bekaul pejalai projek nya nyengkaum pemar pemansang ba menua bebukit.
Ku iya, gaya tanah dia begunaka perambu sereta belanja pemansang ke besai nyengkaum ngaga sapat tebiang ngambi projek ngaga genturung rumah ulih digaga berurun agi.
“Nya kebuah kami berandau enggau Premier Sarawak ngenataika peminta bantu mutar pekara nya ngambi projek tu ulih ditampung.
“Sebarang chara mutar ke nya, kami bepanggai ba pemintar iya mutar pekara tu,” ku iya ba aum media pengudah penemuai basa nya, Hari Dua.
Ke penemu, menua 10.4 ikar pemesai nya diperambu endur ngentak 105 unit rumah ngaul rumah teres seringkat enggau dua ringkat, enggau pelin pemansang deka diberi ngagai Kaunsil Perambu Nengeri (SPA).
Ngenang pekara bekaul, Mohamad Mortadza madah, KOBAGUS mega benung nyerenih pengulih meli teda tanah semak dia ungkup perambu ngaga siti mengeri pintar tauka ‘Smart City’.
Ku iya, perambu pemansang nya ulih nyadi entara projek pemungkal pemansang mengeri pintar ke digaga koperasi di Sarawak.-EDISI UKAS
Pemberita: Ahmad Daniel Faiz
Gambar: Hazrin Sunaini
