TYT Sarawak & Bini Limpang Ngelawa Pasar Tamu Betong, Ngundang Pedaja Lokal
BETONG: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ngelimpangka awak diri ngelawa Tamu Betong sebedau ngirup pagi di Bansal Bumiputera Kaunsil Pelilih Betong (MDB), ditu, Hari Minggu.
Penatai Tun Pehin Sri Dr Wan Junaidi enggau Toh Puan urung pukul 7 pagi disambut ati lantang bala pedaja sereta pemgusung ke sama enggau masau peluang berandau sereta bisi pengingat begambar enggau seduai melaki bini.
Sekumbang dia, seduai mega bisi meli sekeda utai dijual bala pedaja kelai sukung ngagai aktiviti ekonomi komuniti menua nya.
Tembu pengawa ba pasar tamu, seduai udah nya ngirup pagi di Bansal Bumiputera MDB begulai enggau bala mayuh ke bisi ngirup dia.
Bela nyempulang seduai iya nya Sapit Menteri ba Opis Premier Sarawak (Penyeraris Projek Agensi Pemansang kandang Menua, Kaunsil Mengeri Kuching Utara (DBKU) enggau Pekara Islam), Datuk Dr Abdul Rahman Junaidi, Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu sereta bala bukai.
Program nya sebagi ari isi program serimbai Ngintu Hari PengadaRasmi Kebawah Duli Yang Maha Mulia Seri Paduka Baginda Yang di-Pertuan Agong Ke-17 Renggat Sarawak Taun 2026 ke diatur di Betong.
Iya udah nya ditaga ngulu Program Ngirup Teh serimbai pengerami nya ke diatur di Balai Lumba Tan Sri Datuk Amar Stephen Kalong Ningkan, Betong. - EDISI UKAS
