KAPIT: Pengawa ngentak rumah panjai baru Rumah Kayan di Nanga Dia ukai semina nyendiaka rumah ke lantang agi ngagai peranak aja, tang nyadi lambang ngintu pesaka budaya sereta penyerakup peranak menua pesisir.

Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat madah ke perintah deka seruran ransing bejalaika pemansang ke meri pemaik ngagai rayat, kelebih agi ba kandang menua ulu.

“Rumah panjai ukai semina endur diau aja, tang nyadi lambang budaya, pesaka enggau penyerakup peranak ke patut dijaga ungkup rebak dudi,” ku iya.

Iya nyebut pekara nya ba mua mayuh rambau Pengerami Mangkong Tiang Rumah Panjai Baru Rumah Kayan di Nanga Dia, Jalai Kapit-Song, kena Hari Enam.

Berebak enggau nya, Datuk Jefferson nyemetak madah ke pemansang ke dibai perintah ukai semina nyelinting pengawa nyendiaka infrastruktur aja, tang mega mungkur pekara pelajar, ekonomi enggau pengelantang rayat dikena ngangkatka tikas pengidup peranak menua nya.

Iya mega meransang peranak terus meri sukung ngagai perintah nentuka pemansang menua nya ulih ditampung.

Ba pengerami nya, iya bisi nyuaka pemeri penyampau RM15,000 ngagai Komiti Pemansang enggau Pengelikun Genturung Pendiau (JKKK) enggau Biro Indu Rumah Kayan.

Kelimpah ari nya, tetiap rumah panjai dikangau datai ngulu pengerami nya mega bela nerima pemeri RM5,000.

Iya mega udah setuju ngagihka lebih RM200,000 dikena ngaduka sambung transformer enggau bekal kuasa karan ke rumah panjai nya.

Sama datai, Sekretari Politik Premier Sarawak Watson Awan Jalai, Sapit Residen Bagi Menua Kapit Robert Liman Deli, Penulung Pegawai Pelilih Kapit Anyie Awing enggau Direktor Kandang Menua ‘Upper Rajang Development Agency’ (URDA) Sago Unting. -EDISI UKAS