Kaban Kunsil Nengeri (ADUN) Tellian, Royston Valentine madah, penyiru perintah ke rayat menua pesisir nyata nengah mayuh projek pemansang dipejalai enggau nyendiaka perengkaguna pemun ke sebaka enggau menua bukai.
“Taja pia, pengawa tu napi sekeda penekul nyangkaum jaku bantah sekeda peranak ke ngasauh projek nyau tejanggal.
“Lebuh siti-siti projek tejanggak, peranak nyau lama agi nganti endur ngasai ke perengkaguna nya, lalu ungkus projek meha deka majak nambah belama,” ku iya.
Iya nyebut pekara nya lebuh bejaku ba Program Ngiling Bidai enggau Bejadi Projek Sapat Tanah di Rumah Dari Balin, Nanga Baoh, kena Hari Enam.
Berindik ari nya, Royston ngarap ke peranak terus meri kerejasama enggau liat ati nganti nentuka tetiap projek dilanggur perintah ulih digaga lanchar sereta meri pemaik ngagai rayat.
Ngenang pekara bukai, ku iya, Projek Sapat Tanah ke digaga ba Rumah Dari Balin nya entara inisiatif Perintah Sarawak nyaga endur nya ari penusah tanah tusur.
“Projek beungkus RM500,000 tu udah tembu 13 Mei lalu dikearap ulih meri pemaik timpuh panjai ngagai peranak ditu,” ku iya.
Ngenang pasal Program Ngiling Bidai, ngarap ke adat enggau budaya raban bansa Dayak terus ditan.
Kelimpah ari nya, iya madah ke pemesai guna ngetan penyerakup ba rayat pupu bansa enggau pengarap di Sarawak.
Royston madah baru, pengering Sarawak bepanggai ba penyerakup ke tegap sereta pengelantang ti udah lama ditarak ba rayat.
Sama datai, Penghulu Ambau Achong, Tuai Rumah Dari Balin enggau ADO Felicia Serai. -EDISI UKAS
