SELANGAU: Projek ngaga Opis Pelajar Pelilih (PPD) Selangau ke baru beungkus RM35 juta nyadi siti chara ke besai reti ngemujurka pengawa ngatur pekara pelajar ke majak ngerembai mansang di pelilih nya.

Kaban Kunsil Nnegeri (ADUN) Tamin Ir. Christopher Gira Sambang madah, projek nya disikap enggau perengkaguna moden sereta likun ti mai pengelantang ngagai raban pengajar di Selangau.

"Sebedau tu, pengawa Opis Pelajar Selangau digaga ba premis kedai ke disuwa perintah aja.

"Taja pengawa bekaul pelajar semampai meruan dipejalaika tang bisi penanggul ba perengkaguna lalu enda engkeman tauka enda tetipakka guna ke bendar," pia ku iya.

Iya bejaku munyi nya maya Pengerami Nasih Tanah Projek Ngaga Baru Opis Pelajar Pelilih Selangau ditu, Hari Lima.

Iya mega madah, opis baru nya disadang tau nyungkakka agi tikas pemanah gawa ungkup sekula, pengajar, nembiak sereta rayat mayuh ba pelilih nya.

Kelimpah ari nya, Ir Christopher madah, projek bekaul pelajar ke benung digaga ke bukai nyengkaum Sekula Sekondri (SMK) Selangau beungkus RM81 juta, Projek Ngaga Baru Buding Nembiak Lelaki, Balai Makai enggau ngadu sistem ai beresi di SMK Ulu Balingian.

Kelimpah ari nya ku iya, perintah ngemeratka pengawa ngaga baru enggau ngadu SK Sungai Sepiring, SK Batu 36, SK Dijih enggau SK Penghulu Imban.

Bela datai maya nya Kaban Parlimen Selangau, Edwin Banta, Pegawai Pelilih Selangau, Yalin Assan ti ngarika Residen Sitak Sibu enggau Sapit Pegawai Opis Pelajar Pelilih Selangau Joanes Tulang. - EDISI UKAS