BETONG: Sarawak deka seruran ngetan pengawa bebatak asur, bebaik enggau bebasa ti udah lama nyadi pengering nengeri tu lalu nyadi chuan penyerakup enggau pengelantang menua.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg madah, juluk Yang di-Pertuan Agong Sultan Ibrahim ngerapitka penyerakup nasional endang udah dikembuan rayat Sarawak ti kenyau ari kelia tampak rita nyadi nengeri ti ngerami pengelain sereta nyagu semangat bebasa entara pupu bansa enggau pengarap.
Ku iya, rayat Sarawak ukai semina idup bebaik aja, tang endang idup baka diri sebilik ti mekuh pengawa segulai sejalai ba pengidup besehari-sehari.
“Rumah sembiang digaga berimbai, hari besai dirami begulai enggau bela bebasa ti majak nyadi pun pengidup rayat kitai.
“Pengelantang tu ukai datai pia aja, tang asil pengeran semua raban ti nyaga pemereti ati enggau idup segulai sejalai,” ku iya.
Iya nibar ke jaku nya nengah teks jaku dibacha Menteri ba Opis Premier Sarawak, Dato Sri John Sikie Tayai rambau Pengerami Makai Selamat Pengarap Bukai seirmbai Ngintu Hari Pengada Rasmi Yang di-Pertuan Agong Ke-17 Renggat Sarawak Taun 2026 di Dewan Panglima Rentap, Betong kena Hari Enam.
Nerang silik, iya madah ke pengerami ti ngempuruka mayuh pengarap enggau serap komuniti ukai semina program rasmi aja, tang ngayanka pengering kebendar Sarawak nyadi chuan penyerakup ngagai menua.
Ku iya, rayat di nengeri tu deka terus idup lantang enggau begempung taja datai ari mayuh tirai juru budaya, pengarap enggau pengandal, seriris enggau juluk Yang di-Pertuan Agong deka meda rayat Malaysia idup baka diri sebilik ke bebasa ke pangan diri.
Berebak enggau nya, iya madah ke isu sensitif bekaul pengarap, raban bansa enggau institusyen diraja tauka 3R enda patut dikena beambi ulih datai ke tau ngeruga pengelantang enggau penegap menua.
Iya nerang, pengawa milih Betong nyadi tuai rumah ngintu pengerami taun tu ngayanka gamal Sarawak kebendar ti idup lantang enggau bebaik.
“Ari masejit, gerija enggau kuil ti didiri berimbai enggau pangan diri ba menua tu nyadi lambang bela bebasa enggau besukung ti udah lama dikemeran peranak menua tu.
“Perintah Sarawak deka ransing agi nyaga pengelantang entara raban bansa enggau pengarap nengah mayuh inisiatif ti meri pemaik ngagai semua rayat nadai ngira tirai juru,” ku iya.
Sama datai, Sapit Menteri Dagang Antarabansa, Industri enggau Meranak Puku Sarawak, Datuk Malcolm Mussen Lamoh, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Sapit Sekretari Perintah Sarawak (Operasyen), Datu Hii Chang Kee, Direktor Unit Pekara Pengarap Bukai (UNIFOR), Dato Georgina Apphia Ngau sereta temuai bukai. -EDISI UKAS
