TYT Sarawak & Bini Ngulu Pengerami Makai Selamat Serimbai Hari Pengada Rasmi Agong Renggat Sarawak
BETONG: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ngulu Pengerami Makai Selamat serimbai Ngintu Hari Pengada Rasmi Yang di-Pertuan Agong Ke-17 Renggat Sarawak Taun 2026 di Masjid Jamek Betong kena Hari Enam.
Pengerami nya ngempuruka bala tuai perintah, pengereja opis perintah enggau raban orang Islam menua nya ke mujur diatur enggau pemereti ati mandangka terima kasih sereta taluk ke institusi Raja Berperlembagaan.
Datai ngari ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg iya nya Sapit Menteri ba Opis Premier Sarawak (Penyeraris Projek Agensi Pemansang Kandang Menua, Kaunsil Mengeri Kuching Utara (DBKU) enggau Pekara Islam), Datuk Dr. Abdul Rahman Junaidi.
Sama datai, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Pemansang Indu, Nembiak Mit enggau Pengelantang Komuniti Sarawak (Pengelantang Komuniti), Datuk Mohammad Razi Sitam, Direktor Opis Pengarap Islam Sarawak (JAIS), Datu Mual Suaud sereta temuai dipebasa bukai.
Pengerami dipun enggau Sembiang Fardhu Maghrib bebala mayuh sebedau ditampung enggau bacha Yaasin enggau Sampi Terima Kasih betuai ke Sapit Imam Besai Sarawak, Sahibul Fadilah Ustaz Muhammad Ihsan Haidzir.
Pengerami udah nya richah enggau Zikir Marhaban ari Gempung Gerup Zikir Bagi Menua Betong ke nambahka agi pemereti ati enggau pengerichah pengerami nya.
TYT Sarawak enggau Toh Puan Fauziah udah nya ngulu pengawa makai serumpu makai lemai ke diatur dikena ngerichahka agi Pengerami Makai Selamat.
Bela datai ngulu pengerami serumpu makai lemai nya Sapit Premier Sarawak, Datuk Amar Douglas Uggah Embas, Menteri ba Opis Premier Sarawak, Dato Sri John Sikie Tayai, Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan, Sapit Menteri Nembiak, Lumba enggau Pemansang Orang Dagang, Datuk Gerald Rentap Jabu, Kaban Parlimen Betong, Dato Dr. Richard Rapu, Residen Bahgi Menua Betong, Datu Richard Michael Abunawas, sereta bala bukai.
Pengerami Makai Selamat nya entara isi program Ngintu Hari Pengada Rasmi Yang di-Pertuan Agong Ke-17 Renggat Sarawak Taun 2026 ke diatur di Bagi Menua Betong.-EDISI UKAS
