MIRI: Taste of Borneo Cultural Carnival (TOBC) 4.0 deka nempa lambar baru ba landskap dagang temuai budaya menua lebuh ngempuru 32 serakup etnik ba pengawa bjalai beraban budaya pemadu besai ti diselinting diaku Malaysia Book of Records, seraya nyagu Miri nyadi pintu penama diplomasi budaya enggau dagang temuai antarabansa.
Karnival ti deka diatur ari 1 nyentuk 12 Julai tu ba Entepan Entukar Boulevard Miri nya mega deka nyadi pelasar ngerembai rentayan kerejasama budaya antarabansa nengah kerejasama deligit ari Yunnan, China sereta nyempil kaul sebakih entara institusyen budaya enggau raban bekuasa lokal kededua kandang menua.
Residen Bagi Menua Miri ti mega Chairman Begulai TOBC, Galong Luang madah, pengawa bejalai beraban TOBC kena 1 Julai tu disadang nyadi perati ngempuru penyereta ari 32 serakup etnik, empat sekula sekondari sereta deligit budaya ari Yunnan.
Ku iya, inisiatif nya ukai semina dikena nempa rikod nasional, tang mega nyadi pelasar ngelaku bemacham budaya enggau pesaka asal komuniti Borneo ba mata antarabansa.
“Kerejasama bemacham etnik ari Sarawak enggau deligit menua luar nunjukka TOBC terus mansang nyadi pelasar ngempung budaya ti ulih narit perati komuniti global,” ku iya.
Iya madah munyi nya ba aum pemberita TOBC 4.0 ti diatur ba Opis Residen Bagi Menua Miri kena Hari Lima.
Pengawa bejalai beraban nya deka digulu pengari etnik Han, Yi, Hani, Zhuang, Wa enggau De’ang ari Yunnan ti deka ngayanka penyelai budaya seraya nambah elemen antarabansa ngagai atur karnival taun tu.
Nambah ke nya, Program Seni Budaya Tanda Borneo ti deka diatur kena 3 Julai deka ngempuru raban budaya ari Sarawak, Sabah, Brunei Darussalam, Indonesia enggau Yunnan dikena negap pengawa besilih budaya sereta ngelaku pesaka Borneo ba renggat serantau.
Program nya deka richah enggau penatai Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah nyadi temuai dipebasa.
TOBC 4.0 kena 4 Julai mega deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Kelimpah pemerindang main asal enggau pemandang etnik, pengerami nya deka ngemata pengawa nyain Sempekat Bebakih entara Taste of Borneo Cultural Carnival enggau Society of Yunnan Nationalities sereta Pengawa Nyain Mengeri Sebakih entara Majlis Bandaraya Miri enggau Perintah Rayat Perbandaran Lijiang, China.
Inisiatif nya deka nyendia peluang kerejasama besai agi ba bidang dagang temuai, budaya, ekonomi kreatif enggau pemansang komuniti seraya nyempil kaul entara Sarawak enggau China.
TOBC 4.0 dipeda nyadi pelasar strategik negap diplomasi budaya, ngeranchak industri dagang temuai sereta ngelaku pengaya pesaka asal Borneo ngagai dunya, nipak aspirasyen nyagu Miri nyadi palan dagang temuai budaya di rantau tu. - EDISI UKAS
