KUCHING: Perintah Sarawak merambu ngena endur ngelingi Tekat Ai Baleh dikena nempa palan ti ulih nyukung pemansut ikan empurau seraya ngerembai makit spesies ikan premium nya dudi hari.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya deka dipejalai nengah pengawa betanamka paung kayu ti ngasilka pemansut pemakai ungkup ikan empurau ngelingi tekat ai nya.

“Di Kapit, kitai bisi tekat ai Baleh. Sungai ba Baleh nya, ba tisi kitai deka nanam paung kayu, ti mansutka pemakai ungkup empurau.

“Nya kebuah, kitai ulih nyendia endur ungkup empurau lalu kitai ulih ngerembai makit empurau,” ku iya.

Ku Datuk Patinggi Abang Zohari, inisiatif nya entara inisiatif ti ulih dipejalai dikena ngena pengeraja asal Sarawak dikena mansutka ekonomi ti tinggi agi.

Ku iya agi, empurau ti dikelala nyadi entara ikan sungai pemadu berega di Sarawak bisi pengulih besai dijual ngagai segmen premium, seraya nyungkak pemansang ekonomi nengeri.

Iya mega nyemetak madah ke Sarawak ukai semina meri perati ngagai pemansang sektor kuasa enggau infrastruktur, tang mega terus negap agenda sekuriti pemakai sereta mansutka asil lokal ti bisi rega komersial tinggi. - EDISI UKAS

Pemberita : Nur Nabilla
Gambar : Ibanez Jeffery Guang