Inisiatif nya dipeda nipak juluk perintah nengeri dikena negap pemansang kandang menua utara nyadi pintu penama strategik pemansang ekonomi ngilah adan menua kelimpah nentuka penyebela entara pemansang ekonomi, pengelantang rayat enggau pemeruan rampa menua.
Sapit Premier Sarawak, Datuk Amar Awang Tengah Ali Hasan madah, penemuai rasmi deligit Sarawak ke Austria nya sebagi ari inisiatif meruan perintah nengeri nyukung pejalai Strategi Pemansang Pengudah COVID-19 2030 (PCDS 2030) ti ngemerat pengelantang ekonomi, bungkur rama, pemeruan rampa menua, inovasyen enggau pemansang bepuguka data.
Bejaku ba pengerami makai lemai ti diatur Kedutaan Malaysia di Vienna kena Hari Empat, iya mega meri terima kasih ngagai raban kedutaan ke pemanah sereta sukung ti diberi sepanjai program penemuai deligit Sarawak di Austria.
Ku iya, penemuai ke Aspern Seestadt meri peneleba ti chukup berega senentang baka ni siti mengeri moden ulih dikemansang nengah integrasyen berumah, aktiviti komersial, pengangkut mensia mayuh, palan gadung enggau palan komuniti ba siti langgur pemansang ti komprehensif.
“Penemuai ke Aspern Seestadt relevan amat tu mandangka baka ni projek pemansang mengeri moden ulih ngempung genturung pendiau, pengangkut mensia mayuh, aktiviti komersial, palan gadung, palan komuniti enggau langgur tengkebang mengeri pintar ba siti perambu ti meruan,” ku iya.
Ku iya, inisiatif nya engkeman amat nyadi malin nyendia Pelin Limbang-Lawas 2035 dikena nempa mengeri adan menua ti meruan enggau beretan agi sereta bisi rentayan penyambung dikena nyukung pemansang ekonomi sereta nambah kualiti idup komuniti.
Deligit Sarawak mega ngatur pejalai ngabas Loji Hidroelekterik Freudenau ti mandangka baka ni infrastruktur kuasa ulih dikena baru ulih dikemansang nengah pengawa ngintu sungai, nyaga rampa menua enggau pemansang mengeri chara meruan.
Nangkan nya, ku iya, entara asil besai ti dikearap ari pejalai ngabas iya dikena ngelala inisiatif perambu ti engkeman ngambi dikemeran ba pemansang Limbang enggau Lawas, ngaul sukut guna tanah begulai, pemansang mengeri meruan, kuasa ulih dikena baru, pemansang tebing sungai, infrastruktur gadung, perengkaguna mensia mayuh sereta strategi ti nemban.
Ku iya, penemu enggau peneleba ari Vienna deka nyaup Sarawak ngelanggur pemansang Limbang enggau Lawas nyadi mengeri adan menua ti kompetitif, moden enggau meruan.
Berebak enggau, inisiatif nya dikeandal ulih negap pengelikun kuasa timpuh panjai, nambah semekih rampa menua sereta ngeranchak pemansang ekonomi kandang menua utara Sarawak nipak agenda pemansang nengeri manggai 2030.
“Utai ti dipelajar Vienna sehari tu ukai semina model pemansang mengeri tang nyadi malin berega nempa pemansang Limbang enggau Lawas nyadi mengeri adan menua ti progresif, meruan enggau besemekih ba rantau tu,” ku iya. - EDISI UKAS
