“Tuai ti sikar, bisi integriti enggau juluk beguna amat nentuka pemansang sereta sosioekonomi ulih diasai ke komuniti,” ku iya.
Iya madah munyi nya lebuh bejadi Program Negap enggau Ngatur JKKK Rumah Panjai serimbai Pengerami Medamit 2026 di Balai Komuniti Medamit, kena Hari Empat.
Ku iya, penau JKKK enggau KMKK ngenatai penerang, nerang ke polisi perintah sereta ngelala peminta rayat deka nentuka penemban bejalaika mayuh program pemansang ba renggat komuniti.
Berebak enggau nya, iya nyemetak madah ke kaul rat entara tuai renggat baruh, agensi perintah enggau mensia mayuh meseti terus ditegap nentuka nadai rayat dikelaung ari ngasai ke pemaik bemacham inisiatif enggau bantu ti disediaka perintah.
Nambah ke nya, Dato Paulus madah ke program negap nya nyadi pelasar beguna nambah penemu, pengelandik enggau penau bala kaban JKKK ngambi sedia agi napi pemar pemansang kemaya hari.
Iya mega meri terima kasih ngagai Serakup Dayak Iban Sarawak (SADIA) Pampang Limbang laban udah ngatur program nya ti nyadi inisiatif strategik negap kapasiti tuai komuniti menua pesisir.
Ku iya, inisiatif negap institusyen JKKK enggau KMKK meseti ditampung laban kededua nya raban gawa ba luan ti mangku pengawa besai nentuka agenda pemansang perintah ulih dipejalai meruan enggau inklusif.
Program Negap enggau Ngatur JKKK Rumah Panjai nya entara isi program Pengerami Medamit 2026 ti diatur ari 19 nyentuk 21 June.
Program nya mega richah enggau pemandang agensi perintah, pedagang bejual produk sereta mayuh aktiviti main asal ti mandangka pupu bansa di Bagi Menua Limbang.
Bela datai, pengari Pegawai Pelilih Limbang, Donny Dunggat; Residen Bagi Menua Kapit ti nyadi pengelicha dikangau, Elvis Didit; Temenggong Willie Marum Liaw sereta KMKK Iban Limbang. - EDISI UKAS
