KAPIT: Sepenyampau 33 organisasyen enggau gerempung di sitak Parlimen Kapit nerima agih belanja Projek Mit Pemansang Menua Pesisir (MRP) penyampau RM339,000 dikena nyukung mayuh program enggau aktiviti ngaul komuniti ti dipejalai.

Agih belanja nya disua Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat ba sebengkah pengawa nyua diatur ba siti hotel ditu, Hari Lima.

Iya madah, tuju bantu nya ngenegapka pangku pengawa organisasyen komuniti bejalaika aktiviti ngintu pengelantang, pelajar, pemansang nembiak enggau lumba, kelimpah bejalaika servis ke meri pemaik ngagai rayat.

“Perintah Sarawak seruran ransing nyukung pemansang komuniti enggau nambah pengelantang rayat nengah mayuh inisiatif bant uke meri pemaik terus ngagai rayat,” ku iya.

Datuk Jefferson Jamit ngarap ke bantu ke diberi nya ulih mantu penerima bejalaika program sereta aktiviti ke meri empas positif ngagai komuniti sida empu.

Sama datai, Sekretari Politik Premier Sarawak Watson Awan Jalai, Sapit Residen Bagi Menua Kapit Robert Liman Deli, Tuai Unit Rama enggau Pekara Mensia Mayuh Residen Bagi Menua Kapit Daniel Batin, Pegawai Pemansang Rama URDA Dr. Nelson Brandah Seli, Pegawai Kaul Komuniti (CLO) N.63 Bukit Goram Kelimbik Sibat sereta Pemancha Pasang Tuba.- EDISI UKAS