BINTANGOR: Pengerami nyambut Hari Gawai mengkang nyadi pelasar ngenegap kaul rayat pupu basa di Sarawak ke nyadi pugu pengelantang enggau pemansang nengeri tu.
Kaban Parlimen Tanjong Manis, Dato Ir Yusuf Abd Wahab madah, pengelebih ti dikembuan Sarawak nya tebantai tiap maya hari besai ke bela dirami rayat begulai bebala mayuh enda ngira bansa enggau jalai pengarap.
Ku iya, pengerindu ngabang ngagai pangan diri endang udah lama dikemeran ari menya lalu patut semampai ditanka tiap iku rayat.
"Pengelebih tu nyadi pesaka ke chukup berega ba kitai. Tu patut ditegapka agi ngambika rebak dudi meruan ngemeran ulah ke sebaka," pia ku iya.
Iya bejaku munyi nya ba Pengerami Ngabang Gawai ke diatur ba Rumah James, Muara Bunut ditu, Hari Tiga tu tadi.
Dato Ir Yusuf madah, Hari Gawai ukai semina hari besai bansa Dayak aja tang siti awak dikena nyungkak sereta ngenegap kaul rayat mayuh.
Ku iya, kaul manah bansa Melayu, Melanau, China, Dayak enggau bansa bukai ngelai penegap kaul ti nyadi pengering menua Sarawak.
Bela datai maya nya Sapit Menteri ba Opis Premier Sarawak (Pekara Korporat, Pemadah enggau UKAS) ke mega Kaban Kunsil Nengeri (ADUN) Semop, Datuk Abdullah Saidol.-EDISI UKAS
