BINTANGOR: Perintah Sarawak bepegai tegap ba prinsip enda bechiping beduaka macham bengkah bantu enggau inisiatif pengelantang ungkup rayat ti begunaka bantu enda ngira bansa, pengarap enggau penemu politik.

Kaban Parlimen Tanjong Manis, Dato Ir Yusuf Abd Wahab madah, chara nya deka nentuka bantu perintah ulih dikenatai ngagai semua rayat ti patut ba selampur nengeri.

Ku iya, penumbuh macham bengkah program pengintu pengelantang bela ngelai perintah nengeri ransing deka meda genap iku rayat enda tinggal ari ngasai pemansang.

"Perintah Sarawak deka semua rayat nerima bantu bepelasarka pematut lalu ukai ngira bansa tauka penemu politik.

"Sida ke patut dibantu endang disaup nengah macham inisiatif perintah," pia ku iya.

Iya nerangka pekara nya maya Pengerami Ngabang Gawai ke diatur ba Rumah James, Muara Bunut ditu, Hari Tiga tu tadi.

Dato Ir Yusuf mega madah, kelimpah bantu pengelantang, perintah nengeri mega bisi numbuh macham inisiatif ba pekara pelajar enggau pengerai ke dikena nyaup ngelempung tating belanja rayat.

Ku iya, polisi Perintah Sarawak deka nentuka pemansang enggau bantu bela diasaika rayat baikka ba mengeri tauka menua pesisir.

"Ke beguna iya nya, kitai deka meda rayat ke patut semua deka disaup," ku iya madah baru.-EDISI UKAS