KUCHING: Sijil Tinggi Persekolahan Malaysia (STPM) 2025 di Sarawak majak nempa penyulut alai Purata Nilai Gred Keseluruhan (PNGK) nengeri nambah ngagai 2.75 enti dibanding 2.68 taun sebedau nya.
Sapit Direktor Opis Pelajar Sarawak (Sektor Pengatur Sekula) Dr Les Met madah, pemujur nya ngelai pengeransing bala pengajar, nembiak, apai indai sereta bala mayuh ke bukai ti deka meda tikas pelajar nengeri tu disungkakka.
“PNGK STPM 2025 Sarawak udah nambah ari 2.68 ba taun 2024 ngagai 2.75 ba taun 2025.
"Tu bepun ari pengeransing semua nyungkakka tikas pelajar di nengeri tu," pia ku iya.
Iya bejaku munyi nya maya ngarika Direktor Opis Pelajar Sarawak Omar Mahli ba Pengerami Mantai enggau Apresiasyen Pemutus STPM 2025 Renggat Sarawak ba Sekula Sekondri (SMK) Tun Abang Haji Openg ditu, Hari Empat.
Iya madah, penyampau nembiak ke bulih PNGK 4.00 bela nambah ngagai 115 iku tauka 2.19 peratus enti dibanding 92 iku tauka 1.61 peratus ba taun 2024.
Kelimpah ari nya, dua iku chalun ke ngambi lima mata pelajar bela bulih gred 5A ti empai kala dirikod taun sebedau tu.
Penyampau nembiak ke bulih 4A mega nambah ari 91 iku ngagai 110 iku.
Penyampau pas penuh nembiak ke ngambi empat enggau lima mata pelajar bela nambah ari 98.16 peratus ba STPM 2024 ngagai 98.71 peratus.
Ari semua penyampau nembiak ke ngambi peresa, 5,257 iku tauka 99.96 peratus ulih nerima Setipikit STPM 2025.
Ba renggat sekula, bisi 14 buah sekula bulih PNGK 3.00 enggau lebih ari nya lalu 52 ari 79 sekula ngerikod PNGK nambah enti dibanding taun sebedau nya.
Sarawak mega nempa pemujur ba renggat nasional alai Kolej Pom Enam Saratok dipadu nyadi Palan Pom Enam Pemadu Nyulut Menua STPM 2025 ba kategori Kolej Pom Enam, lalu SMK Sacred Heart, Sibu dipadu nyadi Palan Pom Enam Pemadu Nyulut Menua ba kategori Mod 2 enggau Mod 3.
Kelimpah ari nya, nembiak SMK Methodist, Sibu, Sharifah Nur Hazwani Wan Sapare dipadu ngempu anugerah Nembiak Pemadu Nyulut Menua Mata Pelajar Bahasa Melayu STPM 2025.-EDISI UKAS
