KAPIT: Sapit Menteri ba Opis Premier Sarawak (Undang-Undang enggau Adat Bumiputera) ke mega Kaban Kunsil Nengeri (ADUN) Bukit Goram, Datuk Jefferson Jamit Unyat meri agih belanja ngagai sekeda komuniti rumah panjai maya Program Randau Komuniti UKAS 2026 ke diatur di Rumah William Unchat, Sungai Yong, kena Hari Lima.

Ba program nya, iya ngemendarka agih belanja sepenyampau RM15,000 ngagai Komiti Pemansang enggau Pengelikun Genturung Pendiau (JKKK) sereta Biro Indu Rumah William Unchat, kelimpah RM5,000 ngagai tetiap rumah panjai ke bisi datai.

Lebuh bejaku, iya nyemetak madah ke pemesai guna penyerakup enggau kerejasama rayat nyadi pun ngagai pemansang ke dipejalai belama enggau inklusif, kelebih agi ba menua pesisir.

Seraya Sapit Residen Bagi Menua Kapit, Robert Liman Deli madah ke Randau Komuniti UKAS ari baruh inisiatif Sarawakku Sayang (SKS) nya nyadi pelasar beguna ti mai servis perintah semak ngagai rayat.

Ku iya, program nya ngasuh mayuh agensi perintah ulih gawa ngenataika penerang, polisi enggau servis terus ngagai rayat menua nya.-EDISI UKAS