ENGKILILI: Penyerakup nyadi pun nentuka pemansang ulih dipejalai nemban ba renggat rumah panjai enggau peranak, lalu nyamin pengelantang peranak menua pesisir.
Kaban Parlimen Lubok Antu, Roy Angau Gingkoi madah, kerejasama enggau rayat begempung ukai semina ulih ngerapitka kaul peranak aja, tang nyadi pun ngagai pemujur mayuh agenda pemansang ba menua pesisir.
Iya nyebut pekara nya lebuh bejadika Pengerami Ngiling Tikai Gawai Dayak 2026 ke dipegulai enggau Pengerami Ngintu Genap Taun Ke-30 Komiti Pemansang enggau Pengelikun Pendiau (JKKK) Rumah Rebecca, Lipat Ulu kena Hari Enam.
Berebak enggau nya, Roy Angau nyemetak madah ke pemesai guna ngintu pengawa asal Ngiling Tikai nyadi pesaka budaya raban bansa Dayak ke nyadi identiti sereta pengelala komuniti.
Iya mega madah, pemansang sosioekonomi peranak menua pesisir patut majak chakah agi dipejalai nyengkaum nengah perambu ngaga siti balai ti ulih dikena peranak dia endur ngatur mayuh aktiviti ngaul komuniti.
Kelimpah ari nya, iya meransang apai indai enggau peranak bukai meri peransang ngagai bala nembiak ngaul diri ba pengawa lumba laban sektor nya bisi pengulih nempa atlit nyulut kelimpah nyadi batang penatai pemisi dudi hari.
Kelai sukung ke pemansang peranak dia, iya ngemendarka agih belanja RM20,000 nengah Geran Projek Mit Pemansang Menua Pesisir (MRP) ungkup JKKK Rumah Rebecca, RM8,000 ungkup Biro Indu sereta RM100,000 ari baruh Program Transformasyen Menua Pesisir (RTP) ngagai JKKK Lipat Ulu ungkup taun 2027.-EDISI UKAS
