SIBU: Program Townhall serimbai Ngintu Hari Sarawak 2026 ke diatur 22 Julai ila di Sibu disadang ngempuru urung 1,000 penyereta datai ari rayat menua nya enggau peranak ari menua ngelingi.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Haji Saidol madah, program nya nyadi pelasar beguna ngenegapka komunikasyen entara perintah enggau rayat, kelimpah ngenataika penerang bekaul pemansang sereta tunga tuju Sarawak terus ngagai rayat.

Ku iya, pemujur ngatur program nya begunaka kerejasama rat bala komiti pengatur nentuka tetiap perambu ulih dipejalai lanchar enggau nemban.

Iya ke mega Sapit Menteri Ngempu Tanggungpengawa ngatur Townhall Hari Sarawak 2026 ngarap ke rayat menua ke datai ila ngaul serap umur enggau tirai juru nentuka program nya inklusif sereta nyapai tuju ditetapka.

Ngena sulu jaku “Sarawak Maju Makmur”, program Townhall nya disadang digulu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, lalu deka diatur di Dewan Canselor Tun Abdul Taib Mahmud, Universiti Teknologi Sarawak (UTS) kena 22 Julai 2026.

Pekara nya dipadah ba Aum Komiti Pengatur Townhall Hari Sarawak 2026 Tusun 1/2026 diatur di Universiti Teknologi Sarawak (UTS) kena Hari Satu.

Aum nya mega berandauka mayuh pengawa besikap nyengkaum logistik, pengatur penyereta, publisiti sereta penyeraris pengawa entara agensi ke ngaul diri nentuka Townhall Hari Sarawak 2026 diatur lanchar enggau nyapai tuju ke ditetapka.-EDISI UKAS