Borneo Tales Creative Hub Nyerungkai Kerejasama Strategik Enggau UKAS
KUCHING: Borneo Tales Creative Hub begulai enggau Etika Sdn Bhd nyerungkai pengulih kerejasama strategik enggau Unit Komunikasi Awam Sarawak (UKAS) nengah penemuai basa ke diatur ba opis agensi nya, Hari Dua.
Tuju penemuai nya ngenegapka kaul profesional entara kededua raban kelimpah ngerandang peluang kerejasama dudi hari ba bidang komunikasyen strategik, ngelaku chap dagang, pemansang konten kreatif sereta ngelati industri kreatif lokal.
Pengari Borneo Tales Creative Hub Lim Hui Ching madah ke kompeni bepengkalan di Kuching nya nyadi agensi makit enggau kaul mensia mayuh ke mantu ngelakuka chap dagang lokal sereta meri sukung ari sukut melanja enggau pemansang kimpin komunikasyen.
Ku iya, penemuai nya mega nyadi pelasar besilih penemu bekaul peluang kerejasama ke ulih diserungkai begulai enggau UKAS dudi hari ila.
“Batang tuju pejalai kami sehari tu ngatur penemuai basa ngagai UKAS sereta meri terima kasih ke sukung enggau ngerembaika berita ungkup program ke diatur kami sebedau tu,” ku iya.
Iya nyebut jaku nya lebuh dirandaun pengudah penemuai basa nya.
Lebuh berandau, Lim Hui Ching mega bis nerangka Kit Perhubungan Awam (PR Kit) Pepsi edisyen khas Gawai enggau Kaamatan ke mandangka asil keranjai jari tulin artis lokal ari Sabah enggau Sarawak.
Ku iya, insiaitif nya ngayanka pengeran raban korporat mantaika penau kreatif lokal nengah pelasar makit besai, lalu ngaku keranjai jari peranak menua.
“Gaya langkar ba tin Pepsi edisyen khas tu digaga artis lokal ari Sabah enggau Sarawak lalu dilanchar khas serimbai kimpin Gawai enggau Kaamatan taun tu,” ku iya.
Seraya pengari Etika Sdn Bhd Chong Ted Shyang madah ke penemuai nya meri peluang ngagai kededua raban sama bekelala enggau pangan diri sereta nyempil kaul kerejasama ke udah ditanggam sebedau tu.
“Penemuai tu meri peluang ngagai kami bekelala enggau nanggam kaul rat agi, ukai semina ngelala pangan diri aja nengah pengawa rasmi sebedau tu,” ku iya.
Iya mega ngarap ke kaul ke ditanggam nengah penemuai nya ulih ngerandang mayuh agi peluang kerejasama entara sektor korporat, industri kreatif enggau agensi perintah dikena ngelakuka Sarawak sereta ngenegapka penau lokal.
Penemuai nya ngayanka pengeran mayuh raban ngenegapka rentayan kerejasama strategik dikena nyukung pemansang industri kreatif, ngerembai pengawa ngelaku budaya lokal sereta nyagu keranjai ari anak Sarawak enggau Sabah ngagai tikas besai agi.— EDISI UKAS
