KUCHING: Servis Perintah Sarawak (SCS) ba jalai ke betul dikena nyungkak pejalai Strategi Pemansang Pengudah COVID-19 (PCDS) 2030 ke nemban enggau meri pemaik nyengala ngagai rayat.

Sekretari Perintah Sarawak, Datuk Amar Mohamad Abu Bakar Marzuki madah, SCS seruran sedia ari sukut kapasiti enggau penau dikena nyukung semua inisiatif ke dipejalaika Premier Sarawak.

Ku iya, mayuh pengawa seruran dipejalai dikena ngenegapka penau orang gawa perintah ngambi setipak enggau ubah rampa ngenataika servis perintah.

“Kitai meri perati ngagai chara bisi asil. Reti nya, tetiap perambu, pengawa dipejalai enggau projek meseti bisi asil ke ulih diasai rayat.

“Rayat meseti ngasai pemaik ari tetiap projek enggau inisiatif ke dipejalai laban ba kitai, rayat seruran dikemerat,” ku iya.

Iya nyebut jaku nya lebuh dirandau media pengudah bejadika Pengerami Anugerah Servis Nyulut (APC) 2025 Sarawak Forestry Corporation (SFC).

Sama datai, Menijar Besai SFC Abang Arabi Abang Aimran.

Ngenang silik, iya madah ke SCS mega meri perati ngemeran chara kereja baru enggau ngena teknologi digital ba raban gawa perintah nentuka servis dikenatai sikar agi enggau efektif.

Ku iya, chara 3R iya nya ‘revisit’, ‘rethink’ enggau ‘recharge’ patut ditarak belama ngambi orang gawa perintah seruran nyerenih pretasyen, mutar pengelemi enggau ngetanka budaya inovasyen dalam organisasyen.

“Ari ubah ekspektasyen rayat, kitai nyadi orang gawa perintah mega patut berubah ba chara ngenataika servis.

“Enti bisi chara baru ke nemban agi, kitai patut ngena nentuka servis diberi seruran relevan enggau nangkup peminta rayat,” ku iya.

Berebak enggau nya, iya madah ke empas agenda pemansang nengeri majak nyengala diasai rayat nengah mayuh projek besai enggau pemansang infrastruktur dipejalai di selampur Sarawak.

Iya nerang, projek baka skim nangkir genturung pendiau, ngaga jematan enggau jalai alun, sereta projek bekal ai enggau kuasa karan udah meri pemaik terus ngagai rayat ba mengeri enggau menua pesisir.

Taja agi bisi sekeda pekara ke patut ditambah, tang iya meri jamin SCS deka majak ransing nentuka tetiap projek pemansang ulih diasai rayat. -EDISI UKAS