MIRI: Tuan Yang Terutama (TYT) Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau Toh Puan Datuk Patinggi Fauziah Mohd Sanusi ngulu Program Sampi Ujung Taun 1447 Hijrah enggau Pun Taun 1448 Hijrah Renggat Sarawak ke diatur di Masjid At-Taqwa, Hari Dua.

Sama datai, Speaker Kunsil Nengeri (DUN) Sarawak, Tan Sri Datuk Amar Mohammad Asfia Awang Nassar, Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah, Yang Dipertua Kaunsil Islam Sarawak, Datuk Misnu Taha, Direktor Opis Pengarap Islam Sarawak, Ustaz Mual Suaud, bala sapit menteri sereta tuai opis.

Program dipun enggau bacha Sampi Ujung Taun 1447H sebedau azan Maghrib lalu ditampung enggau Sembiang Fardu Maghrib bebala mayuh.

Program udah nya ditampung enggau bacha Sampi Pun Taun 1448H, Surah Yaasin sereta Tazkirah Maal Hijrah dikenataika Dekan Fakulti Pengajian Islam Universiti Kebangsaan Malaysia (UKM), Prof. Dato’ Dr. Mohd Izhar Ariff Mohd Kashim.

Sembiang Fardu Isyak bebala mayuh bela diatur sebedau pengawa tembu enggau makai lemai ke mega digulu Menteri Pengangkut Sarawak, Dato Sri Lee Kim Shin sereta sekeda kaban Kabinet Sarawak.

Tun Pehin Sri Dr Wan Junaidi mega ditaga Ngulu Pengawa Gempuru Ngintu Maal Hijrah Renggat Sarawak Taun 2026 di Stadium Tertutup Miri kena Hari Tiga.

Program nya entara isi program nyambut Maal Hijrah renggat nengeri dikena narak pemereti ati ngagai pengarap enggau ngerapit kaul rayat serimbai penatai taun baru Hijrah 1448H.-EDISI UKAS