PUTRAJAYA: Opis Menteri Dagang Temuai, Industri Kreatif enggau Seni Pemerindang (MTCP) Sarawak kemari ngatur penemuai gawa ke Tuai Sekretari Opis Menteri Dagang Temuai, Seni enggau Budaya Malaysia (MOTAC), Dato’ Shaharuddin Abu Sohot dikena ngenegapka kerejasama strategik entara Perintah Sarawak enggau Perintah Besai ba pemansang sektor dagang temuai.

Delegit MTCP betuai ke Sapit Sekretari Perintah Sarawak (Perambu Ekonomi enggau Pemansang), Dato Sri Dr. Muhammad Abdullah Zaidel begulai enggau Sekretari Mendam MTCP, Morshidi Fredrick.

Penemuai nya nyadi pelasar besai ngagai kededua raban ngenegapka sinergi, nambahka penyeraris pengawa sereta berandauka agenda dagang temuai Sarawak senutuk enggau semangat Sempekat Malaysia 1963 (MA63).

Ku Dato Sri Dr. Muhammad Abdullah, kerejasama enggau pengawa begulai entara semua raban beguna endar nentuka tetiap inisiatif ke dipejalai ulih meri pemaik nyata ngagai komuniti, pemekuh industri enggau menua.

Berebak enggau nya, MTCP mega madah ke pemesai guna ngaku penyelai enggau pengering Sarawak ngemansangka ekosistem dagang temuai ke meruan, inklusif enggau ulih besemekih.

Randau mega bisi ngenang bekaul rampa dagang temuai nyelai Sarawak ke mungkur pesaka budaya, biodiversiti, pengawa lama orang asal, industri kreatif sereta pematak rampa menua asal ke nyadi pengering nengeri tu.

Penemuai nya mega ngenegapka pengawa MTCP enggau MOTAC nentuka sektor dagang temuai nyadi nyadi penyungkak ekonomi tumbuh, ngintu budaya enggau pemansang meruan ngagai Sarawak sereta Malaysia.-EDISI UKAS