DUN Telang Usan Ngalih Ngagai Ekonomi Gadung, Nyerungkai Pengulih Nyimpan Karbon
MIRI: Sitak Kunsil Nengeri (DUN) Telang Usan diatu meri perati ngagai pemansang ekonomi gadung, nyimpan karbon enggau kuasa ulih dikena baru nentuka pemansang menua nya majak meruan.
Kaban Kunsil Nengeri (ADUN) Telang Usan, Datuk Dennis Ngau madah, ubah nya patut diadu laban industri kayu batang ke dulu suba nyadi penyungkak ekonomi peranak Baram diatu nyau ukai nyadi pemansut ekonomi menua nya.
“Kelia, kitai endang bepanggai ba industri kayu batang nyadi pemansut ekonomi peranak Baram.
“Diatu kayu batang nyau nadai agi, nya kebuah kitai enda tau enda ngalih ngagai ekonomi baru ke meruan agi enggau ulih besemekih,” ku iya.
Iya nyebut jaku nya ba Pengawa Nyua Geran Projek Mit Pemansang Menua Pesisir (MRP) di Miri, kena Hari Dua.
Datuk Dennis madah baru, pengawa ngemansangka industri nyimpan karbon (carbon storage) nengah pengawa ngintu kampung nyadi entara inisiatif ke seriris enggau agenda ekonomi gadung dikemudi Perintah Sarawak ari baruh PCDS 2030.
Ku iya, kelimpah ari nya, pemansang Long Lama nyadi Palan Pemansang Menua Pesisir (Rural Growth Centre – RGC) deka majak diberi perati nengah mayuh perambu strategik ke dilangkar ungkup ngeranchakka aktiviti ekonomi di Telang Usan.
“Long Lama deka bulih pemaik ari pengawa ngaga jalai ke nyambung menua nya enggau rentayan Jalai Sabah-Sarawak-Brunei (SSR), lalu nyadi jalai ditengah penguna entara Sabah, Sarawak enggau Mulu.
“Enti udah bisi jalai, deka bisi peluang ekonomi. Long Lama enggau Telang Usan badu agi dikelaung ari arus pemansang,” ku iya.
Datuk Dennis mega madah, Projek Baram Agrivoltaic di Temalak ke ngaul pemansang ladang solar bedandang bisi pengulih nyadi penyungkak transformasyen ekonomi menua pesisir di Baram.
Ku iya, projek beungkus manggai bilion ringgit nya disadang nyendiaka pengawa puang sereta meri empas besai ngagai sektor pengangkut, dagang, endur diau bemalam, pemakai, ai irup sereta latih pengelandik ngagai peranak menua.
Iya mega andal ke ari pemayuh projek strategik bepe;asarka ekonomi gadung, kuasa ulih dikena baru enggau pemansang menua pesisir ke dipejalai deka nentuka Baram lebih agi Telang Usan majak maju.
Dulu ari nya, iya nyuaka geran MRP penyampau RM846,000 ngagai 42 gerempung, serakup, rumah sembiang enggau organisasyen komuniti di Telang Usan.- EDISI UKAS
