LUBOK ANTU: Pengerami Ngiling Tikai Gawai Dayak Pelilih Lubok Antu meri pemaik besai ngagai komuniti menua lebuh belanja pemansang enggau bantu komuniti sepenyampau lebih RM298,000 dikemendar ngagai peranak Nanga San enggau Nanga San Pandak.
Sapit Menteri Dagang Antarabansa, Industri enggau Pengawa Meranak Puku Sarawak ti mega Kaban Kunsil Nengeri (ADUN) Batang Ai, Datuk Dr Malcolm Mussen Lamoh madah, iya udah ngemendar agih belanja tambah sepenyampau RM50,000 dikena nyaup negap atur aktiviti komuniti sereta nyukung bemacham program pemansang enggau pengelantang ba renggat baruh.
Ku iya, RM30,000 ari penyampau nya diagih ngagai Komiti Pemansang enggau Pengelikun Genturung Pendiau (JKKK) Nanga San, RM10,000 ngagai Gerempung Indu Nanga San enggau RM10,000 ngagai JKKK Nanga San Pandak.
Nambah ke nya, ku iya, Perintah Sarawak deka terus meri perati ngagai peminta pemansang ba Pelilih Lubok Antu kelebih agi bekaul infrastruktur enggau utiliti pemun dikena nyaga pengelantang rayat menua pesisir.
Ngenang isu bekal ai, Datuk Dr Malcolm nerang ke Perintah Sarawak nengah Gabungan Parti Sarawak (GPS) udah ngemendar agih belanja sepenyampau RM2.3 bilion dikena bejalaika Projek Water Grid Sarawak ngambi negap sistem bekal ai ba selampur nengeri.
Ku iya, projek besai nya pengeran perintah nentuka rayat ngasai akses bekal ai ti entap enggau bekualiti agi dudi hari.
Nangkan nya, Kaban Parlimen Lubok Antu, Roy Angau Gingkoi mega ngemendar agih belanja sepenyampau RM248,000, nyengkaum RM200,000 nengah Program Transfomasyen Menua Pesisir (RTP) 2027 ngagai JKKK Nanga San dikena ngaga pagar rumah panjai.
Iya mega ngagihka belanja RM20,000 ngagai JKKK Nanga San, RM8,000 ngagai Gerempung Indu Nanga San, RM15,000 ngagai JKKK Nanga San Pandak sereta RM5,000 ngagai Gerempung Indu Nanga San Pandak.
Ku iya, bantu enggau belanja ti diagih nya mandangka pengeran perintah nentuka pemansang menua pesisir terus ditegap sereta pengelantang komuniti semampai diperati.
Bela datai, Chairman Pengatur Pengerami Ngiling Tikai Gawai Dayak Pelilih Lubok Antu, Akoi Ejau. -EDISI UKAS
