BUTTERWORTH: Unit Komunikasi Awam Sarawak (UKAS) terus nyempil kaul strategik enggau pemekuh media menua nengah pengawa ngambi bagi ba Hari Pemberita Nasional (HAWANA) 2026 ti diatur di Palan Konvensyen PICCA@Arena Butterworth ditu kena Hari Enam.

Deligit Sarawak ke HAWANA 2026 diulu ke Sapit Sekretari Perintah Sarawak (Operasyen), Datu Hii Chang Kee.

Bela nyempulang iya nya Direktor UKAS, Awang Putrayusrie Awang Redzuan, Sapit Direktor UKAS, Mohamed Faizal Shah Ali sereta pegawai kanan UKAS.

HAWANA 2026 ti datai ba edisyen keenam taun tu ngempuru urung 1,000 pemekuh media ari menua tu enggau menua luar lalu nyadi pelasar besai negap kaul profesional, besilih penemu bekaul pemansang industri media sereta berandauka pemar enggau tunga kuing pemberita ba jeman digital ti majak dinamik.

Besuluka jaku “Media Bisi Integriti, Pugu Kredibiliti”, pengawa sekali tu ngemeratka pemesai guna integriti, etika enggau profesionalisme dikena nempa pengandal komuniti ngagai media nyadi institusyen ngenatai penerang ti betul, engkeman enggau dipechaya.

HAWANA 2026 udah dipenyadi Menteri Besai, Datuk Seri Anwar Ibrahim.

Pemujur UKAS ngambi bagi ba program pemberita pemadu besai menua tu mandangka pengeran Perintah Sarawak negap kerejasama enggau organisasyen media kelimpah nyukung pemansang ekosistem komunikasyen perintah enggau pemberita ti profesional, bisi integriti sereta relevan enggau peminta kemaya hari. - EDISI UKAS