MUKAH: Malam Main Asal ti diatur serimbai Program Bakti Belia MADANI 2026 Renggat Sarawak nyadi pelasar beguna nyaga pesaka budaya sereta nyempil kaul entara nembiak enggau peranak menua.

Kaban Kunsil Nengeri (ADUN) Tellian, Royston Valentine madah, program baka nya ukai semina mandangka pengelain budaya komuniti Melanau enggau bemacham etnik di Sarawak, tang mega narak reti begulai, semangat voluntia sereta penyiru rama entara rebak biak.

“Malam Main Asal tu mega mandangka pemerindang ti ngayanka budaya Melanau sereta pengelantang komuniti Sarawak seraya nyempil kaul entara bala penyereta sereta peranak menua.

“Program baka tu ukai semina nyadi pelasar nyaga enggau nyagu pesaka seni enggau budaya, tang mega narak reti begulai, semangat voluntia enggau penyiru rama entara nembiak sereta komuniti,” ku iya.

Iya madah munyi nya lebuh ngulu Main Main Asal serimbai Program Bakti Belia MADANI 2026 Renggat Sarawak di Balai Kampung Sungai Ragei, kena Hari Enam.

Bela datai, Kaban Kunsil Nengeri (ADUN) Balingian Abdul Yakub Arbi.

Sepanjai program nya, bala mayuh meda bemacham pemerindang main asal nyengkaum tanda asal, belagu enggau pemerindang ari lima genturung ti ngambi bagi ba program nya.

Ba pengerami sebaka, bisi mega diatur simbolik nyuaka Bakul Prihatin diatur SABERKAS ngagai lima penerima asnaf ba Kampung Sungai Ragei kelai penyiru ngagai raban ti begunaka bantu.

Mukah nyadi tuai rumah Program Bakti Belia MADANI 2026 Renggat Sarawak ti diatur pengelama tiga hari, belabuh ari 19 nyentuk 21 June 2026 besuluka jaku Nembiak Siru, Komuniti Lantang.

Program nya ngaul 36 nembiak palan pelajar tinggi menua ari Universiti Teknologi MARA (UiTM) enggau Palan Penyulut Teknologi Sarawak (CENTEXS) Mukah.

Bisi lima segmen diatur sepanjai program iya nya Segmen Penerang Komuniti, Segmen Komuniti Gadung, Segmen Pengerai, Segmen Main Asal enggau Segmen Nembiak Regas.

Lima genturung dipilih nyadi palan ngatur program baka Kampung Datuk, Kampung Sungai Ragei, Kampung Sungai Pegei, Kampung Penakub Permai enggau Kampung Tellian Laut.

Nengah pengawa bejalaika konsep ruang bilik iru, bala penyereta dianjung begulai enggau ruang bilik iru ba genturung pendiau nya sepanjai program diatur dikena meri peluang ngagai sida mereti ke pengidup komuniti menua pesisir sereta ngenang bemacham budaya ba peranak menua. - EDISI UKAS