Konvensyen PBT Sarawak 2026 Ngelati Transformasyen Servis Bepuguka Integriti
KUCHING: Konvensyen Raban Bekuasa Lokal (PBT) Sarawak 2026 ke deka diatur kena 6 enggau 7 Julai ba mua Palan Konvensyen Borneo Kuching (BCCK) disadang nyadi pelasar besai negap atur pengawa, integriti sereta ngerumban transformasyen ngenataika servis PBT dikena nangkup peminta rayat.
Sapit Menteri ba Opis Premier Sarawak (Integriti enggau Ombudsman), Datuk Dr Juanda Jaya madah, konvensyen nya diatur nyadi pelasar ti ngempuru raban PBT, pakar industri, raban akademik enggau mayuh agensi bekunsi peneleba, pengawa pemadu manah enggau penemu baru dikena nambahka kualiti servis ngagai rayat.
Ku iya, konvensyen nya mega meri perati ngagai pengawa negap atur gawa ti manah, narak budaya kereja mekuh integriti, nambah pengawa ngatur pekara belanja ti bisi tanggungpengawa, digital servis sereta ngerembai rentayan kerejasama entara PBT di Sarawak enggau PBT ari selampur menua.
“Pemadu beguna, kitai deka nentuka raban bekuasa lokal seruran relevan, teguh enggau ulih nangkup peminta rayat ti semampai randakka servis pemadu manah,” ku iya ba randau khas begulai enggau Unit Komunikasi Awam Sarawak (UKAS) ditu, Hari Tiga.
Datuk Dr Juanda madah, rambai jaku "Transformasyen Raban Bekuasa Lokal: Nuju Serbis Besai Empas Bepuguka Integriti" dipilih dikena mantangka penemu ke alai pemujur transformasyn ukai semina bepanggai ba teknologi enggau sistem aja, tang bepun ari nempa budaya kereja ti bepuguka integriti.
Ku iya, rayat diatu ukai semina ngarapka servis ti jampat, tang mega servis ti lurus, asi enggau ulih dikearap.
"Integriti nya pun ngagai semua pengawa transformasyen. Taja siti-siti organisasyen ngembuan sistem ti nyulut enggau atur ti genap, tang integriti rayat tetap enda andal ke institusyen ti meri servis,” ku iya.
Nerang silik, iya madah, konvensyen pengelama dua hari nya deka berandauka lapan batang pekara iya nya ngatur pekara wang, integriti enggau akauntabiliti, digital servis, mengeri pintar, mutar sebana, diversifikasi asil sereta pangku pengawa audit negapka atur gawa PBT.
“Kitai deka mai bala pengelicha ari mayuh sektor nyengkaum Tuai Audit Menua, Akauntan Nengeri Sarawak, Ombudsman Sarawak, Sarawak Multimedia Authority, Universiti Malaysia Sarawak (UNIMAS), National Anti-Financial Crime Centre (NFCC), pakar perambu mengeri sereta raban opis bekuasa lokal ti udah diaku pemujur sida ba transformasyen organisasyen.
Datuk Dr Juanda madah baru, mayuh raban deka ngambi bagi ngambi sida bulih chunto pengawa ti pemadu manah ke praktikal enggau ulih disetipak nitih utai diguna PBT sida empu.
Kelimpah ari nya, iya mega madah ke konvensyen nya nerima semua raban PBT nyengkaum bala kaunsilor, pegawai perintah, gempung bekanun, kaban akademik, nembiak institusyen pelajar tinggi, pemansik, pemekuh industri sereta individu ti bisi ati ba pengawa pemansang mengeri enggau ngenataika servis perintah.
Nya alai, iya nesau semua raban ti apin rejista ngambi ngena manah peluang ngulu konvensyen tu dikena ngiri penemu, ngaga rentayan profesional sereta bulih peransang ngaga ubah ti nemban agi ba organisasyen sida.
“Perintah Sarawak ngarap ke mayuh agi PBT ti inovatif deka ditumbuh, jauh tinjau penemu, mekuh integriri, sikar ngatur belanja sereta seruran nangkup peminta rayat.
“Aku pechaya tetiap penyereta ukai semina deka mai penemu enggau kaul baru, tang peransang ngadu transformasyen ti ulih nempa PBT ti sikar, bisi integriti, puh enggau dipechara rayat ke pengelantang Tanah Kenyalang," ku iya.-EDISI UKAS
