Program Anak Kita Negap Literasi enggau Numerasi Nembiak Sarawak
KUCHING: Program Anak Kita (PAK) Sarawak beguna endar dikena negap pun literasi enggau numerasi nembiak ungkup nemppa rebak bepenemu, landik enggau ulih besemekih ngambi tetangkup ke juluk pemansang Sarawak jemah.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, nguasa pengelandik macha, nulis enggau ngira patut dikemerat sebedau nembiak ulih nguasa bidang bukai baka Sains, Teknologi, Injiniring enggau Matematik (STEM), ‘artificial intelligent’ (AI) sereta pengelandik dudi hari.
Ku iya, Program Anak Kita Sarawak dipejalai dikena mantu nembiak ti begunaka embing tambah nengah intervensi tumu enggau sistematik dikena ngedut takah belajar lalu nambah pengandal sida nampung pelajar enggau bala bakih serambau.
“Pemujur PAK ukai semina dipeda ba statistik tauka peratus aja, tang ari pengandal siku-siku nembiak ke diatu ulih macha ngati kediri, badu nangi meda lumur enggau regas belajar dalam kelas,” ku iya lebuh bejaku ba Pengawa Nutup Program Anak Kita Sarawak Learning Seminar 2026 di Kuching kena Hari Tiga.
Iya madah baru, pengawa nguasa literasi enggau numerasi mega nyadi pun ke pemujur mayuh inisiatif pelajar dipejalaika Perintah Sarawak nyengkaum Program Dwibahasa Sarawak (DLP), Sarawak Education Enhancement Programme (SEEP), STEM Catalyst sereta Peresa Penilaian Dual Language Programme Sarawak Taun 6 (UP-DLPS 6).
Iya nerang, Program Anak Kita ukai semina program intervensyen literasi enggau numerasi aja, tang nyadi pengawa meranak puku strategik ba pemansang penau dudi hari sereta pemujur pelajar timpuh panjai nengeri tu.
Berebak enggau nya, iya meri terima kasih ngagai bala pengajar ti nyadi tiang sukung pemujur program nya ari pengepuh, pengeliat ati enggau pengeransing sida ngembing nembiak ti begunaka sukung tambah.
“Pengajar tetap nyadi kedap pelajar. Sida tu bejadika polisi ngagai pengawa, program ngagai empas enggau peluang ba asil ti besai reti ngagai bala anak kitai,” ku iya.
seminar nya ngempuruka bala tuai sekula, pengajar, pegawai pelajar enggau bakih strategik ungkup bekunsi pengawa pemaduh manah enggau peneleba ngatur Program Anak Kita Sarawak.
Program nya mega richah enggau pengawa pemandang poster sekula, sesyen ngelawa galeri enggau nyua Anugerah Chara Ngajar Inovatif PAK Sarawak.
Bala ke datai mega bisi dipandang montaj tiga chalun kepenudi Anugerah Chara Ngajar Inovatif PAK Sarawak ke ngena chara kreatif enggau pemadu manah bala pengajar ti negapka nguasa literasi enggau numerasi nembiai sebedau pengawa nyua anugerah ngagai penerima.
Sama datai, Sapit Menteri Pemansang Penau Sarawak Datuk Francis Harden Hollis sereta Sapit Direktor Sektor Belajar (SPB), Siti Zulaiha Ibrahim.- EDISI UKAS
