SIMANGGANG: Sekula Primeri (SK) Nanga Skrang di Sri Aman patut dipindah ngagai taba baru ketegal begunan sekula nya udah enda likun dikena agi.
Ketegal nya, Opis Pelajar Pelilih (PPD) Sri Aman udah betemu enggau Sapit Menteri Pelajar, Inovasyen enggau Pemansang Pengelandik Sarawak, Datuk Francis Harden Hollis ngenataika langgur taba baru SK Nanga Skrang, Hari Tiga.
Maya nya, PPD Sri Aman mantaika tiga langgur taba baru bepelasarka penyauh, pengulih dilawa, jalai ngagai pasar sereta perengka guna infrastruktur ke endang bisi.
Nitihka PPD Sri Aman, SK Nanga Skrang 8.16 kilometer penyauh ari Pasar Simanggang (nyema jalai nebing tasik udah tembu) alai sekula nya semina ulih dilawa ngena perau aja naka ke diatu.
Sida mega madah, SK Nanga Skrang suah dituntung penusah ampuh ai ketegal semak tebing sungai maya musim pasang raya tauka benak kelimpah betapi enggau penanggi ketegal baya.
Enggau nya, PPD Sri Aman bisi mantaika langgur taba keterubah, 4.92 km penyauh ari Pasar Simanggang lalu jauh ari sungai ti mega muntang dilawa nengah Jematan Batang Lupar 2.
Langgur taba kedua enggau ketiga agi ba endur ke enda jauh ari sungai lalu taba ketiga enda tentu engkeman ketegal agi tau ampuh bah sereta jauh ari Pasar Simanggang.
Ba pengujung randau, Datuk Francis ke mega Kaban Kunsil Nengeri (ADUN) Simanggang mutus milih taba keterubah lalu deka betemu enggau Opis Tanah enggau Survei Sri Aman kena 6 Julai tu dikena nentuka status tanah nya.
Iya mega deka ngatur randau begulai enggau peranak rumah panjai bekaul pengawa mindahka SK Nanga Skrang nya. -EDISI UKAS
