SKS Kapit Pelasar Nyempil Kaul Perintah Enggau Rayat
KUCHING: Kapit deka ditapat lebuh Program Sarawakku Sayang (SKS) Siri Keempat diatur ari 26 nyentuk 28 Jun tu nyadi pelasar nyempil kaul perintah enggau rayat, kelimpah ngayanka pangku pengawa strategik bagi menua nya nyadi ‘powerhouse’ ke pemansang Sarawak.
Menteri Kereja Raya ke mega Kaban Parlimen Kapit, Dato Sri Alexander Nanta Linggi madah, SKS diatur di Kapit meri peluang ngagai rayat ngulihka penerang terus bekaul mayuh polisi, bantu enggau inisiatif perintah, kelimpah ngayanka pengulih besai bagi menua nya nyukung pemansang nengeri.
“Aku ngumbai Kapit tu nyadi ‘the powerhouse of Sarawak’. ‘The powerhouse’, reti nya, uji kitai berati, diatu dua tekat ai hidroelektrik iya nya Murum enggau Bakun bisi dia.
“Lalu kanang dua tiga taun da, Tekat Ai Baleh mega deka tembu lalu di Bagi Menua Kapit. Tu mih ti mansutka bekal kuasa karan ngagai selampur Sarawak,” ku iya.
Iya nyebut pekara nya lebuh nyadi temuai program Juh Randau dikeluar Unit Komunikasi Awam Sarawak (UKAS) begulai enggau Residen Bagi Menua Kapit, Elvis Didit di Studio UKAS kena Hari Tiga.
Iya madah, rayat Kapit mega berasai gagit ke program SKS laban sida ulih bulih penerang terus bekaul mayuh bantu enggau inisiatif perintah nyengkaum pelajar tinggi pechuma, bantu rayat sereta perengkaguna digital ti disediaka Perintah Sarawak.
Seraya Elvis madah ke timbal diterima ari orang dagang lokal ungkup SKS Kapit chukup manah lebuh semua endur bedagang ti disedia udah penuh magang.
“Orang dagang ti ngambi bagi chukup manah. Semua endur ti disediaka kitai bisi 50 iti udah abis. Tu endur sida bejualka pemakai enggau ai irup.
“Sebagi da ungkup sida ti bejual asil krafjari sereta produk lokal baka madu renguyan enggau ke bukai,” terang iya.
Iya mega madah, pemanah timbal diterima ngayanka orang dagang lokal bela ransing nyukung program nya kelimpah ngerandang peluang ngagai sida ngelaku produk diri empu ngagai pengusung.
Pengawa bejadika SKS Siri Keempat deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 27 Jun tu ke mega deka nibar ke jaku ngagai rayat sereta ngulu sekeda program ke udah dilanggur sekumbang iya nemuai ke Kapit.
Kelimpah Sarawak Pavilion enggau Kapit Kitchen ti ngempuru mayuh orang dagang lokal, SKS Kapit mega richah enggau mayuh aktiviti nyengkaum main enggau lumba rayat, chabut e-Pekit sereta pemerindang main asal ti ngaul komuniti menua nya.
Program nya ngangkatka SKS nyadi pelasar ungkup semua ti ngempung elemen pemansang, pengawa dagang, meri servis perintah enggau ngundang rayat ba siti pengawa ti ngaul rayat.-EDISI UKAS
