BINTULU: Rayat Malaysia deka ngasai rega diesel subsidi baruh agi pengudah Perintah MADANI mantaika pengawa nurun rega minyak nya ngagai RM2.10 seliter ba selampur menua belabuh Julai 2026.

Menteri Besai Dato Seri Anwar Ibrahim madah, inisiatif nya dipejalai nengah pengawa ngemaru selinting subsidi diesel ti ngena mekanisme bepelasarka MyKad nentuka subsidi perintah diasai ke rayat Malaysia.

Ku iya, pengawa bejalaika mekanisme baru nya deka nyeraris rega enggau chara meli diesel subsidi ba selampur menua, seraya ngurangka penyalah ngelalai enggau mai minyak chara belalai ti deka ngujungka pengerugi besai ngagai menua.

“Rayat Malaysia ti ngembuan entukar diesel deka ngasai ke rega RM2.10 seliter nengah pengawa ngenuku MyKad seraya sida ti ukai peranak menua enggau enda bulih meseti meli diesel enggau rega nadai subsidi,” ku iya.

Iya madah munyi nya maya Pengawa Nyua Chek Kelai Betukar Status Palan Penyangkai Kapal Bintulu ari Penyangkai Kapal Perintah Besai ngagai Penyangkai Kapal Nengeri di Palan Penyangkai Kapal Bintulu, ditu kena Hari Minggu.

Dato Seri Anwar nerang, pengawa ngemaru nya beguna amat ba gaya penyarut geopolitik diatu ti meri empas ngagai bekal enggau rega minyak global kelebih agi berindik ari penyarut ti nyadi ba Asia Barat.

Ku iya, bida ti nyengala entara rega diesel bisi subsidi enggau rega makit nadai subsidi ngelama tu udah ngujungka aktiviti mai minyak chara belalai enggau salah guna subsidi nyengkaum peranak menua luar.

Nengah chara baru nya, rega diesel di Sabah enggau Sarawak deka diseraris enggau rega di Semenanjung Malaysia lalu ngetu ke pengawa meri subsidi ngagai ukai peranak ti sebedau tu mega ngasai minyak bisi subsidi.

Nambah ke nya, rayat Sabah enggau Sarawak ti ngena entukar diesel deka ngasai rega ti baruh agi ari RM2.15 ngagai kepada RM2.10 seliter, seraya rayat di Semenanjung terus bulih pemaik nengah sistem subsidi beselinting ti manah agi.

Menteri Besai nya nyemetak madah ke perintah naka ulih nentuka pengelantang rayat terus dijaga nengah polisi subsidi ti meruan, asi enggau nemban agi lalu enda ngeruga penuduk fiskal menua.

Penerang silik bekaul atur baru beselinting subsidi diesel deka dipadah Menteri Pekara Wang II, Senator Datuk Seri Amir Hamzah Azizan kena Hari Satu.

Bela datai, Sapit Menteri Besai Malaysia Datuk Amar Fadillah Yusof, dua Sapit Premier Sarawak Datuk Amar Douglas Uggah Embas dan Datuk Amar Professor Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala Menteri Perintah Besai enggau Sarawak, Sekretari Perintah Sarawak Datuk Amar Mohamad Abu Bakar Marzuki, bala sapit menteri, tuai opis enggau tuai komuniti menua. - EDISI UKAS

Pemberita : Firdaus Materang
Gambar : Mohamad Rais