BINTULU: Pengawa nyua chek simbolik ari Premier Sarawak, Datuk Patinggi Tan Sri Dr. Abang Abdul Rahman Zohari Tun Datuk Abang Openg ngagai Menteri Besai, Datuk Seri Anwar Ibrahim mujur diatur ba Pengawa Nyua Chek Nukar Status Penyangkai Kapal Bintulu ti diatur di Auditorium, Aras 1, Menara Kidurong, Kaunsil Penyangkai Kapal Bintulu, sehari tu.

Pengawa besejarah nya kelai penembu pengawa nukar status Penyangkai Kapal Bintulu ti dipeda ulih negap pangku pengawa penyangkai kapal nya nyadi penyungkak besai pemansang ekonomi Sarawak enggau menua.

Dulu ari nya, Menteri Besai, Sapit Menteri Besai enggau Premier Sarawak nemuai ngagai Anjung Tinjau sebedau meda montaj khas ti mandang ka pejalai sereta pemaik strategik Penyangkai Kapal Bintulu ngagai pemansang nengeri.

Pengawa diterus enggau penerang ari Premier Sarawak enggau Menteri Besai ti nyebut bekaul kerejasama rat entara Perintah Besai enggau Perintah Sarawak ngemujur agenda pemansang menua.

Bisi mega diatur pengawa besilih dokumen Sempekat Nembu (Completion Agreement) enggau Sempekat Tiga Raban (Tripartite Agreement) sebedau pengawa nyuaka chek simbolik dipenyadi.

Bela datai, Sapit Menteri Besai Malaysia Datuk Amar Fadillah Yusof, dua Sapit Premier Sarawak Datuk Amar Douglas Uggah Embas dan Datuk Amar Professor Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala Menteri Perintah Besai enggau Sarawak, Sekretari Perintah Sarawak Datuk Amar Mohamad Abu Bakar Marzuki, bala sapit menteri, tuai opis enggau tuai komuniti menua. - EDISI UKAS

Pemberita: Firdaus Materang
Gambar : Mohamad Rais & Jemat Marin