BINTULU: Perintah Sarawak sehari tu nembu ke bayar sepenyampau RM1.8 bilion ngagai Perintah Besai nengah pengawa nyua chek simbolik serimbai pengawa nanggam Sempekat Nembu tauka Completion Agreement seraya kelai sejarah nukar status Penyangkai Kapal Bintulu nyadi penyangkai kapal nengeri.
Pengawa nyuaka chek simbolik ari Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngagai Menteri Besai, Datuk Seri Anwar Ibrahim ngemujur Pengawa Nyua Chek Nukar Status Penyangkai Kapal Bintulu nya.
Premier Sarawak madah, pengawa nya ngelai penembu siti da inisiatif besai ngempu penyangkai kapal strategik nya pengudah ngatur mayuh randau enggau penyikap entara Perintah Sarawak enggau Perintah Besai.
“Nengah pengawa nanggam Sempekat Tembu Bayar enggau nyuaka chek sepenyampau RM1.8 bilion, kitai ngemujur siti da inisiatif besai nukar status Penyangkai Kapal Bintulu,” terang iya.
Iya madah munyi nya ba pengawa nya ti mega dikemata Menteri Besai sereta bala tuai Perintah Besai enggau Perintah Sarawak.
Pengawa besejarah nya dipeda ulih ngentapka penuduk Penyangkai Kapal Bintulu nyadi penyungkak besai pemansang ekonomi Sarawak sereta nambah penau nengeri merambu pemansang sektor maritim, dagang enggau logistik chara strategik agi.
Dulu ari nya, Menteri Besai, Sapit Menteri Besai enggau Premier Sarawak nemuai ngagai Anjung Tinjau sebedau meda montaj khas ti mandang ka pejalai sereta pemaik strategik Penyangkai Kapal Bintulu ngagai pemansang nengeri.
Bela datai, Sapit Menteri Besai Malaysia Datuk Amar Fadillah Yusof, dua Sapit Premier Sarawak Datuk Amar Douglas Uggah Embas dan Datuk Amar Professor Dr Sim Kui Hian, Speaker Kunsil Nengeri Sarawak Tan Sri Datuk Amar Mohamad Asfia Awang Nasar, bala Menteri Perintah Besai enggau Sarawak, Sekretari Perintah Sarawak Datuk Amar Mohamad Abu Bakar Marzuki, bala sapit menteri, tuai opis enggau tuai komuniti menua. - EDISI UKAS
Pemberita: Firdaus Materang
Gambar : Mohamad Rais & Jemat Marin
