KUCHING: Arkib nyadi pekara ke beguna dikena nentuka hak rayat enggau nengeri tu meruan ulih ditan sereta ditegi bepelasarka rikod enggau penerang ke amat, berurun sereta ulih ditemu rebak diatu enggau dudi hari.
Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali madah, rikod sejarah enggau dokumen ukai semina nyadi malin tang nyadi penerang dikena ngenegap penuduk enggau hak Sarawak ba Sempekat Malaysia 1963 (MA63).
"Aku ngarap semua semampai nyukung pengawa nyaga rikod enggau arkib dikena nentuka dokumen Wilayah Sarawak tu meruan dijaga manah, digagaka nyadi digital, diatur enggau engkeman sereta dikena ngambi pulaika pemaik ngagai rayat," pia ku iya.
Iya bejaku munyi nya maya Pengerami Bejadi enggau Forum Minggu Arkib Antarabansa 2026 ditu, Hari Satu.
Iya madah, rambai jaku global taun tu #ArchivesForJustice: Rights, Memory & Futures siti pesan ti nyemetak alai arkib ukai semina palan nyimpann dokumen lama tang siti institusyen ke besai reti ba pengawa nyukung sereta nyaga hak enggau nengkebang pun penemu ungkup dudi hari.
Datuk Sharifah mega ngarapka forum nya ulih ngasilka buah penemu, langgur sereta penemu ke silik agi bekaul arkib, MA63 enggau pengelantang Sarawak jemah ila.
Bela datai, Kaban Kunsil Nengeri (ADUN) Batu Kitang ke mega Kaban Kaunsil Pengatur Pustaka Negeri Sarawak Dato Ir Lo Khere Chiang, Chairman Kaunsil Pengatur Pustaka Negeri Sarawak Datuk Dr Abang Abdul Rauf Abang Zen sereta pemesai ke bukai. -EDISI UKAS
