BAU: Perintah Sarawak udah nentu siti begunan di Pontianak, Kalimantan Barat digaga nyadi Opis Dagang enggau Dagang Temuai Sarawak ti deka nyadi hub ekonomi enggau dagang Sarawak enggau menua nya.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, opis nya deka digaga nitih model ke sebaka enggau Opis Dagang enggau Dagang Temuai Sarawak di Singapura enggau Brunei Darussalam.

"Kitai udah nentu sebuah begunan di Pontianak dikena ngaga opis tu.

"Nya alai, udah tu opis nya ulih nyadi hub kaul kitai enggau menua Kalimantan Barat," pia ku iya.

Iya madah munyi nya ngagai media sepengudah Pengerami Bejadi Bidayuh Cultural Centre Bau (BCCB) sereta Nyua Gazet Rizab Komunal Bumiputera Seksyen 6 Kanun Tanah Sarawak enggau Surat Pala Tanah Seksyen 18 Kanun Tanah Sarawak ungkup DUN Tasik Biru ditu, Hari Satu.

Premier Sarawak mega madah, kaul dagang enggau sektor pengerai antara Sarawak enggau Kalimantan Barat majak ngerembai ti begunaka perengka guna sukung ke lebih agi berurun.

Nya alai ku iya, Sarawak patut berundingka langgur ngaga servis bank di Pontianak nyema kaul dagang nya majak mansang.

"Kitai deka minta AFFIN Bank berunding muka pampang di menua nya.

"Tu deka meri servis ngagai raban dagang antara Kalimantan Barat enggau Sarawak sereta peranak Kalimantan Barat ke bisi dagang di Sarawak," ku iya nerang.

Ba pekara bekaul, iya madah, Balai Dagang Indonesia udah berandau enggau Sarawak senentang langgur numbuh Borneo Chamber of Commerce.

Ku iya, langgur nya nyadi bepun ari penemuai gawa iya ngagai Jakarta sebedau tu lalu pengari Balai Dagang Indonesia disadang deka nemuai ke Sarawak enda lama agi dikena ngatur randau bekaul pekara nya.

Pengerami sehari nya bela digulu Menteri Pelajar, Inovasyen enggau Pemansang Pengelandik Sarawak ke mega Kaban Kunsil Nengeri (ADUN) Tarat, Dato Sri Roland Sagah Wee Inn, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sapit Menteri Pengangkut Sarawak (Sungai enggau Tasik) ke mega ADUN Tasik Biru, Datuk Henry Harry Jinep, Sapit Menteri Pengangkut Sarawai (Penerebai Bilun enggau Jalai Alun), Datuk Dr Jerip Susil, ADUN Serembu, Dato Miro Simuh sereta bala bukai.-EDISI UKAS

Pemberita: Nur Nabilla
Gambar: Ibanez Jeffery Guang & Shahril Haqim