KUCHING: Opis Menteri Industri Pemakai, Komoditi enggau Pemansang Wilayah Sarawak (M-FICORD) ransing nyungkak sektor agro nengeri nengah chara bepelasarka asil, inovasyen enggau ngena teknologi 'artificial intelligence (AI) ti deka nyaup ngenegap pengulih besemekih industri pemakai enggau komoditi Sarawak.

Menteri ba opis menteri nya, Dato Sri Stephen Rundi Utom madah, chara gawa baka ngelama tu enda engkeman agi dikena napi ubah pemansang sektor agro ti majak kompleks sereta kompetitif.

Ku iya, tiap bengkah langgur enggau program ke digaga meseti ditentuka bisi asil ke nyengala sereta meri empas ngagai pemansang industri betanam betupi enggau pemakai nengeri.

"Maya kitai ngaga langgur, tu ukai semina diperambu aja. Ke pengujung iya meseti bisi asil. Enti langgur nya enda mujur digaga, kitai patut berati baru sereta nyerenih manah agi," pia ku iya.

Iya bejaku munyi nya maya Pengerami Gala enggau Nyua Anugerah Inovasyen serimbai Mini Konvensyen Innovative and Creative Circle (ICC) Renggat M-FICORD 2026 ditu, Hari Dua.

Iya mega madah, inovasyen enggau kreativiti patut nyadi budaya gawa semua staf opis menteri nya enggau agensi ari baruh M-FICORD dikena nentuka sektor agro Sarawak majak mansang seriris enggau Pelin Pemansang Udah COVID-19 2030 (PCDS 2030).

Berindik ari pekara nya, Dato Sri Stephen Rundi minta semua opis enggau agensi ari baruh opis menteri nya bekenaka teknologi baru nyengkaum AI dikena nyungkak pengulih gawa enggau produktiviti.

Iya madah, sektor agro Sarawak patut ngatur singkang ngelawa pengawa betanam betupi pintar, ngemansang agropark enggau ngemeran konsep ekonomi beridar dikena nyungkak produktiviti enggau asil tambah industri.

Mini Konvensyen ICC M-FICORD 2026 bisi semilan iti tim inovasyen ke dipilih lalu deka ngarika opis menteri nya besemekih ba renggat nangkan tu.

Maya nya, Opis Betanam Betupi Sarawak dipadu champion lalu mai perais mata duit RM1,500 ditangkan Opis Servis Veterinar Sarawak (DVSS) ba penuduk lumur dua (RM1,300) lalu penuduk ketiga mega bela diempu DVSS (RM1,000).

Pengerami maya nya bela digulu Sapit Menteri Industri Pemakai, Komoditi enggau Pemansang Wilayah (Industri Pemakai) Datuk Dr Abdul Rahman Ismail, Sapit Menteri Industri Pemakai, Komoditi enggau Pemansang Wilayah (Komoditi enggau Pemansang Wilayah) Datuk Martin Ben, Sektari Mendam Opis Menteri Industri Pemakai, Komoditi enggau Pemansang Wilayah Datu Sirai Daha enggau Sapit Sekretari Mendam M-FICORD Sayed Ismail Nasiruddin Dato Sri Wan Hashim. - EDISI UKAS

Pemberita: Lonney Jinab
Gambar: Muhd Zulfadli