PADAWAN: Perintah Sarawak ransing ngemujur langgur pemansang infrastruktur utiliti nengah pengawa ngambi 79 iti projek bekal ai Perintah Besai ke beungkus RM3.47 bilion ti deka nentuka pengawa ngaga projek nya ulih dirumban agi.

Menteri Utiliti enggau Telekomunikasyen Sarawak, Dato Sri Julaihi Narawi madah, pemutus nya digaga ngambi ulih nyeliahka penanggul ba sistem bekal agi nengeri ti bela nentu projek ke udah dilanggur ulih tembu enggau lengkas.

Iya madah ke pekara nya ngagai media maya ngatur penemuai gawa ngagai Sistem Acute Puncak Borneo ditu, Hari Dua.

Iya mega madah, atur pengawa ngambi projek nya diatu agi benung diadu sepengudah Kabinet Perintah Besai besetuju nengah chara prinsip.

Ku iya, pemutus nya digaga nyerumba pengeransing Perintah Sarawak deka ngerumban pengawa ngaga projek bekal ai bepelasarka rikod pengulih nengeri lebih 90 peratus udah mujur nembuka projek bekaul.

"Perintah Sarawak udah ngemendarka belanja semak RM7 bilion dikena ngaga 360 projek ai di selampur nengeri.

"Nya alai, kitai deka semua projek nyengkaum projek ke dipelanja Perintah Besai ulih tembu enggau mujur," ku iya nerang.

Ba pekara bekaul, Dato Sri Julaihi madah, Sistem Acute Puncak Borneo ke diatu udah dikena bisi kapasiti lebih ke tau dikena ba beberapa bengkah genturung pendiau besemak.

Ku iya, tu nyengkaum Kampung Sitang, Kampung Petag enggau Kampung Bangau.

Kelimpah ari nya, peminta bela dikenatai minta sambung bekal ai ngagai Kampung Sapit ke nyadi sebagi ari palan dagang temuai menua pesisir ti agi ngena sistem bekal ai graviti. -EDISI UKAS