KUCHING: Sida ke bisi pikap enggau jip di menua tu ulih minta kuota tambah 100 liter ari subsidi diesel berengkah 1 Julai tu.
Menteri Wang II, Datuk Seri Amir Hamzah Azizan madah, penyampau 100 liter sebulan nya deka nentuka sida ke beempu perengka pengangkut diesel baka pikap enggau jip ulih ngisi mintak nyentuk 300 liter sebulan.
Ku iya, tu dipelabaka chukup nitihka penyampau urung 95 peratus perengka pengangkut diesel ngena kurang ari 300 liter minyak sebulan.
"Bisi dua iti chara minta iya nya nengah www.budimadani.gov.my tauka datai ngelawa Opis Asil Dalam Nengeri (LHDN) tauka Palan Transformasyen Mengeri (UTS) alai bala pegawai dia deka nyaup ngerejista," pia ku iya.
Iya madahka pekara nya ba Aum Penerang Subsidi Diesel ditu, Hari Tiga.
Ba aum media, Datuk Seri Amir Hamzah madah, ba data ari Januari nyentuk Mei taun tu, semina 0.76 peratus perengka pengangkut ngena lebih 200 liter sebulan lalu tu nyadi indikator kuota ke diberi perintah chukup.
Taja pia ku iya, perintah nadai penanggul nyema dipinta berati baru kuota nya baka kala digaga ba BUDI RON95 enggau e-hailing sebedau tu.
"Nya alai diatu kitai meri awak dulu ngagai sistem tu dipejalaika lalu meda nama ke nyadi sebedau pemutus bukai digaga," ku iya madah baru.
