KUCHING: Peranak rumah panjai di Sarawak ke agi ngena injin api mengkang ulih nerima subsidi diesel nengah mekanisme khas ke ditumbuh perintah berengkah 1 Julai tu.

Menteri Wang II, Datuk Seri Amir Hamzah Azizan madah, nengah mekanisme nya, sida ke ulih nerima deka ditentuka Opis Residen.

"Ungkup peranak rumah panjai ke agi ngena injin api, Opis Residen deka nentu bagi sapa ke ulih nerima subsidi tu.

"Nangkan nya, lumur tingki deka dipasuk ba sistem sebedau sida ulih meli diesel ngena subsidi," pia ku iya.

Iya nerangka pekara nya ba aum media sepengudah meri penerang ngagai media bekaul subsidi diesel nya ditu, Hari Tiga.

Kelimpah ari nya, iya madah, perintah mega numbuh mekanisme khas ungkup sida ke mai perau tambang ti agi dikena ba menua pesisir di nengeri tu.

Ku iya, Opis Sungai-Sungai Sarawak (LSS) diberi tanggungpengawa nentu sida ke patut nerima bantu nya.

Iya madah, nama sida ke udah disah deka dikenatai ngagai Opis Menteri Wang sebedau nerima subsidi nya nengah MyKad. -EDISI UKAS