KUCHING: Kerejasama serantau nengah Brunei Darussalam-Indonesia-Malaysia-Philippines East ASEAN Growth Area (BIMP-EAGA) patut ngaga opis ba tiap menua bekaul dikena nentu agenda pemansang enggau ekonomi ulih dipejalaika enggau mujur.
Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, chara nya mega disadang ulih nyungkakka pengulih inisiatif BIMP-EAGA ke udah ditumbuh kenyau ari taun 1994.
Ku iya, BIMP-EAGA ulih beratika pemujur model Opis Dagang enggau Dagang Temuai Sarawak Singapura (STATOS) ngenegapka kaul dagang enggau dagang temuai Sarawak enggau menua bukai.
"Enti ari taun 1994 nyentuk diatu lalu bedau bisi opis serantau, tau berengkah berunding numbuh opis baka ba Davao City enggau menua bukai," pia ku iya ba aum media sepengudah Pengawa Bejadi ‘BIMP-EAGA Tourism Exchange (BETX) 2026’ ditu, Hari Tiga.
Berebak enggau nya, Dato Sri Abdul Karim madah, Sarawak deka nyadi tuai rumah alai ngatur Aum Kluster Dagang Temuai BIMP-EAGA Ke-22 kena 24 enggau 25 Jun tu.
Iya madah, program nya nyadi pelasar dikena berandauka macham pekara enggau inisiatif ti ulih nyungkakka pengulih besemekih dagang temuai serantau.
Ku iya, tu bela mungkur ngenegap kaul, ngelaku dagang temuai meruan, ngatur program begulai sereta ngerumban transformasyen digital ba sektor dagang temuai di rantau BIMP-EAGA.
"Baka ke disebut aku tadi, BIMP-EAGA udah ditumbuh ari taun 1994 lalu agi mayuh pekara patut diperati laban aku ke nyadi menteri ngatur sektor dagang temuai di Sarawak, udah tentu aku deka meda mayuh agi pemujur," pia ku iya.
Kelimpah ari nya, iya madah, rantau BIMP-EAGA bisi lebih 450 juta rayat ke bisi pengulih ngembing pengerembai sektor dagang temuai lalu enda bepanggai ba dagang luar. -EDISI UKAS
