BINTANGOR: Opis Menteri Pelajar (KPM) dipinta meri agih belanja ke chukup dikena nentuka Polisi Pelajar Digital ulih dipenyadi, lebih agi ba kandang menua pesisir.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, agenda ngena digital ba pelajar begunaka pengawa nyendiaka perengkaguna pemun ke chukup nyengkaum komputer, projektor LED enggau mayuh kereban sukung dikena mantu pengawa ngajar enggau belajar (PdP).

“Enti perintah deka ngemujurka Polisi Pelajar Digital, dia opis menteri patut meri agih belanja besai dikena bejalaika polisi tu.

“Anang semina bejalaika polisi ke manah aja, tang puntan nyendiaka utai dikena ngemujurka polisi nya,” ku iya bejaku ba mua mayuh rambau Program Pengerami Gawai di Sekula Primari (SK) Mupong, ditu, Hari Empat.

Ngenang pekara bekaul, Datuk Abdullah mega ngansak opis menteri meri perati ngagai penanggul suntuk belanja ditapi sekula dikena bejalaika aktiviti kokurikulum, rama enggau lumba, lebih agi ba menua ulu.

Ku iya, kelimpah ari penanggul sekula repuk, pekara pemansang nembiak nengah aktiviti luar kelas mega begunaka sukung belanja ke chukup.

Kaban Kunsil Nengeri (ADUN) Semop nya madah baru, aktiviti kokurikulum beguna endar dikena nempa rampa sekula ti ngelantangka runding enggau mantu nempa ulah nembiak ti teguh, bisi pengandal enggau pengelandik rama ti manah.

Iya mega madah, mayuh pengajar ti ransing ngembuan penemu kreatif dikena ngatur program pemansang nembiak, tang sebagi ari nya enda ulih dipealai ketegal suntuk belanja.

Berindik ari nya, iya ngarap ke perintah meri perati ngagai peminta kebendar sekula ari negapka perengkaguna fizikal, nambah belanja kokurikulum sereta meri agih belanja ke chukup dikena ngemujurka agenda pelajar digital menua.-EDISI UKAS